wo jo husn-e-kul ki dalil tha wo KHayal aa ke saja gaya

vo jo husn-e-kul kī dalīl thā vo ḳhayāl aa ke sajā gayā

laḌīñ yuuñ nigāh se bijliyāñ koī jaise parde uThā gayā

maiñ hikāyat-e-dil-e-be-navā meñ ishārat-e-ġham-e-jāvidāñ

maiñ vo harf-e-āḳhir-e-motabar jo likhā gayā na paḌhā gayā

maiñ charāġh-e-hasrat-e-nīm-shab meñ sharār-e-ātish-e-jāñ-ba-lab

dil-e-pur-umīd kī lau thā maiñ mujhe ḳhud vo aa ke bujhā gayā

maiñ ġhubār-e-rāh-e-talab rahā huā dar-ba-dar jo chalī havā

maiñ ujaḌ ke jab huā mutma.in to vo mujh ko dil meñ basā gayā

pas-e-parda dil kā rafīq thā sar-e-parda merā raqīb thā

maiñ miyān-e-radd-o-qubūl thā ki vo aa ke parda haTā gayā

mujhe fikr thī mirī zaat par koī rañg bhī na chaḌhe magar

vo kamāl-e-ġhairat-e-ā.ina mirā aks mujh ko dikhā gayā

mirā dil amiiñ thā nigāh kā thī nigāh mahram-e-tajraba

vo fusūn-e-jalvā kī aabrū mire tajraboñ ko miTā gayā

wo jo husn-e-kul ki dalil tha wo KHayal aa ke saja gaya

laDin yun nigah se bijliyan koi jaise parde uTha gaya

main hikayat-e-dil-e-be-nawa mein ishaarat-e-gham-e-jawidan

main wo harf-e-aKHir-e-motabar jo likha gaya na paDha gaya

main charagh-e-hasrat-e-nim-shab mein sharar-e-atish-e-jaan-ba-lab

dil-e-pur-umid ki lau tha main mujhe KHud wo aa ke bujha gaya

main ghubar-e-rah-e-talab raha hua dar-ba-dar jo chali hawa

main ujaD ke jab hua mutmain to wo mujh ko dil mein basa gaya

pas-e-parda dil ka rafiq tha sar-e-parda mera raqib tha

main miyan-e-radd-o-qubul tha ki wo aa ke parda haTa gaya

mujhe fikr thi meri zat par koi rang bhi na chaDhe magar

wo kamal-e-ghairat-e-aina mera aks mujh ko dikha gaya

mera dil amin tha nigah ka thi nigah mahram-e-tajraba

wo fusun-e-jalwa ki aabru mere tajrabon ko miTa gaya