khulne hi lage un par asrar-e-shabab aaKHir

khulne hī lage un par asrār-e-shabāb āḳhir

aane hī lagā ham se ab un ko hijāb āḳhir

tāmīl-e-kitāb avval tāvīl-e-kitāb āḳhir

tadbīr o amal avval taqrīr o ḳhitāb āḳhir

is ḳhaak ke putle kī kyā ḳhuub kahānī hai

masjūd-e-malak avval rusvā o ḳharāb āḳhir

go ḳhud vo nahīñ karte baḳhshish meñ hisāb avval

denā hai magar ham ko ik roz hisāb āḳhir

dīdār se pahle hī kyā haal huā dil kā

kyā hogā jo ulTeñge vo ruḳh se naqāb āḳhir

mahrūm ne rah jaanā kotāhi-e-himmat se

hone ko hai ai 'vāsif' ye bazm-e-sharāb āḳhir

khulne hi lage un par asrar-e-shabab aaKHir

aane hi laga hum se ab un ko hijab aaKHir

tamil-e-kitab awwal tawil-e-kitab aaKHir

tadbir o amal awwal taqrir o KHitab aaKHir

is KHak ke putle ki kya KHub kahani hai

masjud-e-malak awwal ruswa o KHarab aaKHir

go KHud wo nahin karte baKHshish mein hisab awwal

dena hai magar hum ko ek roz hisab aaKHir

didar se pahle hi kya haal hua dil ka

kya hoga jo ulTenge wo ruKH se naqab aaKHir

mahrum ne rah jaana kotahi-e-himmat se

hone ko hai ai 'wasif' ye bazm-e-sharab aaKHir