tere tausan ko saba bandhte hain

tere tausan ko sabā bāñdhte haiñ

ham bhī mazmūñ kī havā bāñdhte haiñ

aah kā kis ne asar dekhā hai

ham bhī ek apnī havā bāñdhte haiñ

terī fursat ke muqābil ai umr

barq ko pa-ba-hinā bāñdhte haiñ

qaid-e-hastī se rihā.ī mā'lūm

ashk ko be-sar-o-pā bāñdhte haiñ

nashsha-e-rañg se hai vāshud-e-gul

mast kab band-e-qabā bāñdhte haiñ

ġhalatī-hā-e-mazāmīñ mat pūchh

log naale ko rasā bāñdhte haiñ

ahl-e-tadbīr kī vāmāndgiyāñ

ābloñ par bhī hinā bāñdhte haiñ

saada purkār haiñ ḳhūbāñ 'ġhālib'

ham se paimān-e-vafā bāñdhte haiñ

paañv meñ jab vo hinā bāñdhte haiñ

mere hāthoñ ko judā bāñdhte haiñ

husn-e-afsurda-dilī-hā-rangīñ

shauq ko pā-ba-hinā bāñdhte haiñ

qaid meñ bhī hai asīrī āzād

chashm-e-zanjīr ko vā bāñdhte haiñ

shaiḳh-jī ka.abe kā jaanā mā'lūm

aap masjid meñ gadhā bāñdhte haiñ

kis kā dil zulf se bhāgā ki 'asad'

dast-e-shāna ba-qazā bāñdhte haiñ

tere bīmār pe haiñ fariyādī

vo jo kāġhaz meñ davā bāñdhte haiñ

tere tausan ko saba bandhte hain

hum bhi mazmun ki hawa bandhte hain

aah ka kis ne asar dekha hai

hum bhi ek apni hawa bandhte hain

teri fursat ke muqabil ai umr

barq ko pa-ba-hina bandhte hain

qaid-e-hasti se rihai ma'lum

ashk ko be-sar-o-pa bandhte hain

nashsha-e-rang se hai washud-e-gul

mast kab band-e-qaba bandhte hain

ghalati-ha-e-mazamin mat puchh

log nale ko rasa bandhte hain

ahl-e-tadbir ki wamandgiyan

aablon par bhi hina bandhte hain

sada purkar hain KHuban 'ghaalib'

hum se paiman-e-wafa bandhte hain

panw mein jab wo hina bandhte hain

mere hathon ko juda bandhte hain

husn-e-afsurda-dili-ha-rangin

shauq ko pa-ba-hina bandhte hain

qaid mein bhi hai asiri aazad

chashm-e-zanjir ko wa bandhte hain

shaiKH-ji kabe ka jaana ma'lum

aap masjid mein gadha bandhte hain

kis ka dil zulf se bhaga ki 'asad'

dast-e-shana ba-qaza bandhte hain

tere bimar pe hain fariyaadi

wo jo kaghaz mein dawa bandhte hain