uThte hue qadmon ki dhamak aane lagi hai

uThte hue qadmoñ kī dhamak aane lagī hai

pau phaTne se pahle hī galī jaag uThī hai

āshiq ho to choroñ meñ bhī ab naam likhāo

darvāza bhale band hai khiḌkī to khulī hai

log apne makānoñ kī taraf bhaag rahe haiñ

ghar vāloñ pe jaise koī uftād paḌī hai

ai bād-e-sabā kis liye phirtī hai pareshāñ

kyā tū bhī usī phuul kī Thukrā.ī huī hai

aa gardish-e-daurāñ tujhe siine se lagā luuñ

ab tak to mirī jaañ tū mire saath rahī hai

ab aa.e ho duniyā meñ to yuuñ muñh na bigāḌo

do roz to rahnā hai burī hai to burī hai

bāzār ke dāmoñ kī shikāyat hai har ik ko

phir bhī sar-e-bāzār baḌī bhiiḌ lagī hai

kāñTe kī tarah suukh ke rah jāoge 'alvī'

chhoḌo ye ġhazal-goī ye bīmārī burī hai

uThte hue qadmon ki dhamak aane lagi hai

pau phaTne se pahle hi gali jag uThi hai

aashiq ho to choron mein bhi ab nam likhao

darwaza bhale band hai khiDki to khuli hai

log apne makanon ki taraf bhag rahe hain

ghar walon pe jaise koi uftad paDi hai

ai baad-e-saba kis liye phirti hai pareshan

kya tu bhi usi phul ki Thukrai hui hai

aa gardish-e-dauran tujhe sine se laga lun

ab tak to meri jaan tu mere sath rahi hai

ab aae ho duniya mein to yun munh na bigaDo

do roz to rahna hai buri hai to buri hai

bazar ke damon ki shikayat hai har ek ko

phir bhi sar-e-bazar baDi bhiD lagi hai

kanTe ki tarah sukh ke rah jaoge 'alwi'

chhoDo ye ghazal-goi ye bimari buri hai