wo ehtiyat ke mausam badal gae kaise

vo ehtiyāt ke mausam badal ga.e kaise

charāġh dil ke añdhere meñ jal ga.e kaise

banā diyā thā zamāne ne barf ke mānind

ham ek shoḳh kiran se pighal ga.e kaise

umiid jin se thī vaz-e-junūñ nibhāne kī

vo log vaqt ke sāñche meñ Dhal ga.e kaise

sitāre jazb hue gard-e-rāh meñ kyā kyā

ḳhayāl-o-ḳhvāb ke aa.iiñ badal ga.e kaise

ḳhizāñ se jin ko bachā laa.e the jatan kar ke

vo naḳhl ab ke bahāroñ meñ jal ga.e kaise

na jaane kyuuñ jinheñ samjhe the ham farishte haiñ

qarīb aa.e to chehre badal ga.e kaise

har ek sāya-e-dīvār kī lapeT meñ hai

'surūr' aap hī bach kar nikal ga.e kaise

wo ehtiyat ke mausam badal gae kaise

charagh dil ke andhere mein jal gae kaise

bana diya tha zamane ne barf ke manind

hum ek shoKH kiran se pighal gae kaise

umid jin se thi waz-e-junun nibhane ki

wo log waqt ke sanche mein Dhal gae kaise

sitare jazb hue gard-e-rah mein kya kya

KHayal-o-KHwab ke aain badal gae kaise

KHizan se jin ko bacha lae the jatan kar ke

wo naKHl ab ke bahaaron mein jal gae kaise

na jaane kyun jinhen samjhe the hum farishte hain

qarib aae to chehre badal gae kaise

har ek saya-e-diwar ki lapeT mein hai

'surur' aap hi bach kar nikal gae kaise