وہ شوخ دل و جاں کی تمنا تو نہ نکلا

وہ شوخ دل و جاں کی تمنا تو نہ نکلا

شعلہ تو نہ نکلا وہ شرارا تو نہ نکلا

محسوس کیا درد کے ہر روپ میں اس کو

آواز کا افسوں کبھی جھوٹا تو نہ نکلا

محرومیٔ جاوید نے دونوں ہی کو مارا

یہ راز محبت کوئی گہرا تو نہ نکلا

یہ دل کا خرابہ ہی تری راہ گزر تھی

کعبہ تو نہ نکلا وہ کلیسا تو نہ نکلا

وہ میرے مقدر کی سیاہی تھا سراپا

نور شب مہتاب سنہرا تو نہ نکلا

ہم بھی کسی شیریں کے لیے خانہ بدر تھے

فرہاد رہ عشق میں تنہا تو نہ نکلا

اس میں تری خلوت کا ہر اک رنگ ہے پایا

یہ چاند سر چرخ اکیلا تو نہ نکلا

پہلے سے بڑھی اور غم عشق کی تلخی

تو بھی مرے دم ساز مسیحا تو نہ نکلا

انداز بیاں تیرا عظیمؔ اور ہی کچھ ہے

دیکھے سبھی فن کار پہ تجھ سا تو نہ نکلا