sawad-e-gham ho ya bazm-e-tarab kuchh bhi nahin hota

savād-e-ġham ho yā bazm-e-tarab kuchh bhī nahīñ hotā

zabāñ marham rakkhe yā zaḳhm ab kuchh bhī nahīñ hotā

chale aate haiñ be-mausam kī bārish kī tarah aañsū

basā-auqāt rone kā sabab kuchh bhī nahīñ hotā

jo hotā hai to bas itnā ki lafzoñ kā bharam TuuTe

suḳhan aatā hai aksar tā-ba-lab kuchh bhī nahīñ hotā

kabhī the mehrbāñ mausam kabhī sāvan barastā thā

aur ab dhartī hai saarī tishna-lab kuchh bhī nahīñ hotā

tamannā jhāñktī hai rauzan-e-zindāñ se chhup chhup kar

asīrī meñ magar anjām-e-shab kuchh bhī nahīñ hotā

qayāmat sī guzartī hai qayāmat aa nahīñ jaatī

koī be-jān ho yā jāñ-ba-lab kuchh bhī nahīñ hotā

jibillat sar uThā le to ḳhas-o-ḳhāshāk hai insāñ

baḌā ho naam yā ūñchā nasab kuchh bhī nahīñ hotā

yahāñ hotā hai ba.ad-az-marg vāvailā bahut lekin

koī mar mar ke jab jiitā ho tab kuchh bhī nahīñ hotā

ye duniyā hai yahāñ tārīḳh hī dohrā.ī jaatī hai

anokhā kuchh nahīñ hotā 'ajab kuchh bhī nahīñ hotā

sawad-e-gham ho ya bazm-e-tarab kuchh bhi nahin hota

zaban marham rakkhe ya zaKHm ab kuchh bhi nahin hota

chale aate hain be-mausam ki barish ki tarah aansu

basa-auqat rone ka sabab kuchh bhi nahin hota

jo hota hai to bas itna ki lafzon ka bharam TuTe

suKHan aata hai aksar ta-ba-lab kuchh bhi nahin hota

kabhi the mehrban mausam kabhi sawan barasta tha

aur ab dharti hai sari tishna-lab kuchh bhi nahin hota

tamanna jhankti hai rauzan-e-zindan se chhup chhup kar

asiri mein magar anjam-e-shab kuchh bhi nahin hota

qayamat si guzarti hai qayamat aa nahin jati

koi be-jaan ho ya jaan-ba-lab kuchh bhi nahin hota

jibillat sar uTha le to KHas-o-KHashak hai insan

baDa ho nam ya uncha nasab kuchh bhi nahin hota

yahan hota hai baad-az-marg wawaila bahut lekin

koi mar mar ke jab jita ho tab kuchh bhi nahin hota

ye duniya hai yahan tariKH hi dohrai jati hai

anokha kuchh nahin hota 'ajab kuchh bhi nahin hota