aankh ki qismat hai ab bahta samundar dekhna

aañkh kī qismat hai ab bahtā samundar dekhnā

aur phir ik Dūbte sūraj kā manzar dekhnā

shaam ho jaa.e to din kā ġham manāne ke liye

ek shola sā munavvar apne andar dekhnā

raushnī meñ apnī shaḳhsiyat pe jab bhī sochnā

apne qad ko apne saa.e se bhī kam-tar dekhnā

sañg-e-manzil isti.āra sañg-e-marqad kā na ho

apne zinda jism ko patthar banā kar dekhnā

kaisī aahaT hai pas-e-dīvār āḳhir kaun hai

aañkh bantā jā rahā hai rauzan-e-dar dekhnā

aisā lagtā hai ki dīvāroñ meñ dar khul jā.eñge

sāya-e-dīvār ke ḳhāmosh tevar dekhnā

ik taraf uḌte abābīl ik taraf as.hāb-e-fīl

ab ke apne kāba-e-jāñ kā muqaddar dekhnā

safha-e-qirtās hai yā zañg-ḳhurda ā.īna

likh rahe haiñ aaj kyā apne suḳhan-var dekhnā

aankh ki qismat hai ab bahta samundar dekhna

aur phir ek Dubte suraj ka manzar dekhna

sham ho jae to din ka gham manane ke liye

ek shola sa munawwar apne andar dekhna

raushni mein apni shaKHsiyat pe jab bhi sochna

apne qad ko apne sae se bhi kam-tar dekhna

sang-e-manzil istiara sang-e-marqad ka na ho

apne zinda jism ko patthar bana kar dekhna

kaisi aahaT hai pas-e-diwar aaKHir kaun hai

aankh banta ja raha hai rauzan-e-dar dekhna

aisa lagta hai ki diwaron mein dar khul jaenge

saya-e-diwar ke KHamosh tewar dekhna

ek taraf uDte ababil ek taraf ashab-e-fil

ab ke apne kaba-e-jaan ka muqaddar dekhna

safha-e-qirtas hai ya zang-KHurda aaina

likh rahe hain aaj kya apne suKHan-war dekhna