bujhi hai aatish-e-rang-e-bahaar aahista aahista

bujhī hai ātish-e-rañg-e-bahār āhista āhista

gire haiñ shola-e-gul se sharār āhista āhista

vo ik qatra ki barg-e-dil pe shabnam sā laraztā thā

huā hai bahr-e-nā-paidā-kanār āhista āhista

kabhī shor-e-qayāmat gosh-e-inshāñ tak bhī pahuñchegā

koī sayyāra badlegā madār āhista āhista

uḌā hai rafta rafta rañg tasvīr-e-mohabbat kā

huī hai rasm-e-ulfat be-viqār āhista āhista

sarāb-e-ārzū meñ phir koī manzar bhī chamkegā

uThegī dasht se mauj-e-ġhubār āhista āhista

bahut din tak salāsil kī sadā aa.ī hai zindāñ se

milā hai be-qarāroñ ko qarār āhista āhista

vo sab arbāb-e-jazb-o-shauq jin par naaz thā ham ko

hue haiñ hosh-mandī ke shikār āhista āhista

kabhī malhūz ham ko bhī suḳhan meñ rabt-e-ma.anī thā

huā hai zahr-e-ġham āshufta-kār āhista āhista

kahīñ yaaro tumheñ phir gahrī yāsiyyat na chhū jaa.e

raho rāh-e-talab meñ mahv-e-kār āhista āhista

bujhi hai aatish-e-rang-e-bahaar aahista aahista

gire hain shola-e-gul se sharar aahista aahista

wo ek qatra ki barg-e-dil pe shabnam sa larazta tha

hua hai bahr-e-na-paida-kanar aahista aahista

kabhi shor-e-qayamat gosh-e-inshan tak bhi pahunchega

koi sayyara badlega madar aahista aahista

uDa hai rafta rafta rang taswir-e-mohabbat ka

hui hai rasm-e-ulfat be-wiqar aahista aahista

sarab-e-arzu mein phir koi manzar bhi chamkega

uThegi dasht se mauj-e-ghubar aahista aahista

bahut din tak salasil ki sada aai hai zindan se

mila hai be-qararon ko qarar aahista aahista

wo sab arbab-e-jazb-o-shauq jin par naz tha hum ko

hue hain hosh-mandi ke shikar aahista aahista

kabhi malhuz hum ko bhi suKHan mein rabt-e-mani tha

hua hai zahr-e-gham aashufta-kar aahista aahista

kahin yaro tumhein phir gahri yasiyyat na chhu jae

raho rah-e-talab mein mahw-e-kar aahista aahista