kis takalluf se hamein zer-e-aman rakkha gaya

kis takalluf se hameñ zer-e-amāñ rakkhā gayā

āhanī piñjre meñ apnā āshiyāñ rakkhā gayā

ek hī zanjīr thī us paar se is paar tak

kaj-ravī kā koī vaqfa hī kahāñ rakkhā gayā

apne ḳhvāboñ kī zamīñ par ḳhushk-sālī kab huī

har samay ik ret kā dariyā ravāñ rakkhā gayā

us kināre koī apnā muntazir ho yā na ho

ye bhī kyā kam hai ki itnā ḳhush-gumāñ rakkhā gayā

ab to ham aapas meñ bhī milte nahīñ khulte nahīñ

kis balā kā ḳhauf apne darmiyāñ rakkhā gayā

'yūsuf' ik bhedoñ bhare pul kī rifāqat par hameñ

kitnī vīrāñ sā'atoñ meñ rā.egāñ rakkhā gayā

kis takalluf se hamein zer-e-aman rakkha gaya

aahani pinjre mein apna aashiyan rakkha gaya

ek hi zanjir thi us par se is par tak

kaj-rawi ka koi waqfa hi kahan rakkha gaya

apne KHwabon ki zamin par KHushk-sali kab hui

har samay ek ret ka dariya rawan rakkha gaya

us kinare koi apna muntazir ho ya na ho

ye bhi kya kam hai ki itna KHush-guman rakkha gaya

ab to hum aapas mein bhi milte nahin khulte nahin

kis bala ka KHauf apne darmiyan rakkha gaya

'yusuf' ek bhedon bhare pul ki rifaqat par hamein

kitni viran sa'aton mein raegan rakkha gaya