ishq mein jis ke ye ahwal bana rakkha hai

ishq meñ jis ke ye ahvāl banā rakkhā hai

ab vahī kahtā hai is vaz.a meñ kyā rakkhā hai

le chale ho mujhe is bazm meñ yaaro lekin

kuchh mirā haal bhī pahle se sunā rakkhā hai

hāl-e-dil kaun sunā.e use fursat kis ko

sab ko is aañkh ne bātoñ meñ lagā rakkhā hai

dil burā thā ki bhalā kaam vafā ke aayā

yaar jaane bhī de is bahas meñ kyā rakkhā hai

ai sabā aa ki dikhā.eñ tujhe vo gul jis ne

bātoñ hī bātoñ meñ gulzār khilā rakkhā hai

dekh ai dil na kahīñ baat ye us tak pahuñche

chashm-e-namnāk ne tūfān uThā rakkhā hai

husn chāhe jise hañs bol ke apnā kar le

dil ne apnoñ ko bhī begāna banā rakkhā hai

dil jo is bazm meñ aatā hai to jaatā hī nahīñ

ek din dekhnā dīvāna huā rakkhā hai

haal mat pūchh mohabbat kā havā hai kuchh aur

lā ke kis ne ye sar-e-rāh diyā rakkhā hai

intizām aisā ki ghaTtī hī nahīñ raunaq-e-bazm

ham se kitne haiñ ki vaade pe lagā rakkhā hai

hosh to pahle hī kho aa.e the us mahfil meñ

ab agar jaa.eñ to phir dil bhī gayā rakkhā hai

tere aane kī ḳhabar pā ke abhī se dil ne

shikve ko aur kisī din pe uThā rakkhā hai

bār-hā yuuñ bhī huā terī mohabbat kī qasam

jaan kar ham ne tujhe ḳhud se ḳhafā rakkhā hai

dasht o dar ḳhair manā.eñ ki abhī vahshat meñ

ishq ne pahlā qadam nām-e-ḳhudā rakkhā hai

hijr meñ ranj bhī karte haiñ pe itnā bhī salīm

yaar tū ne to ajab haal banā rakkhā hai

ishq mein jis ke ye ahwal bana rakkha hai

ab wahi kahta hai is waza mein kya rakkha hai

le chale ho mujhe is bazm mein yaro lekin

kuchh mera haal bhi pahle se suna rakkha hai

haal-e-dil kaun sunae use fursat kis ko

sab ko is aankh ne baaton mein laga rakkha hai

dil bura tha ki bhala kaam wafa ke aaya

yar jaane bhi de is bahas mein kya rakkha hai

ai saba aa ki dikhaen tujhe wo gul jis ne

baaton hi baaton mein gulzar khila rakkha hai

dekh ai dil na kahin baat ye us tak pahunche

chashm-e-namnak ne tufan uTha rakkha hai

husn chahe jise hans bol ke apna kar le

dil ne apnon ko bhi begana bana rakkha hai

dil jo is bazm mein aata hai to jata hi nahin

ek din dekhna diwana hua rakkha hai

haal mat puchh mohabbat ka hawa hai kuchh aur

la ke kis ne ye sar-e-rah diya rakkha hai

intizam aisa ki ghaTti hi nahin raunaq-e-bazm

hum se kitne hain ki wade pe laga rakkha hai

hosh to pahle hi kho aae the us mahfil mein

ab agar jaen to phir dil bhi gaya rakkha hai

tere aane ki KHabar pa ke abhi se dil ne

shikwe ko aur kisi din pe uTha rakkha hai

bar-ha yun bhi hua teri mohabbat ki qasam

jaan kar hum ne tujhe KHud se KHafa rakkha hai

dasht o dar KHair manaen ki abhi wahshat mein

ishq ne pahla qadam nam-e-KHuda rakkha hai

hijr mein ranj bhi karte hain pe itna bhi salim

yar tu ne to ajab haal bana rakkha hai