کاغذی حوصلوں سے خوف آیا

کاغذی حوصلوں سے خوف آیا

یا ہمیں بارشوں سے خوف آیا

دیکھ سکتے ہیں چھو نہیں سکتے

ہاتھ بھر فاصلوں سے خوف آیا

خار کانپے کہ پھول کیا نکلیں

پھول کو خوشبوؤں سے خوف آیا

ماں کے قدموں کو چومنے سے گئے

باپ کی مٹھیوں سے خوف آیا

رات جب تم سے مل کے آیا میں

آنے والے دنوں سے خوف آیا

ایک جرثومہ لے گیا بازی

کیا چڑیلوں جنوں سے خوف آیا

جوں ہی ماچس دکھائی سگریٹ کو

اپنی ہی انگلیوں سے خوف آیا

صبح خیزی سے صبح گھبرائی

رات کو رت جگوں سے خوف آیا

یہ کھچا کھچ بھری ہوئی وحشت

بے بسوں کو بسوں سے خوف آیا

پہلے ڈرتا رہا لکیروں سے

پھر مجھے دائروں سے خوف آیا

خالی تنہا اداس سڑکوں پر

گھومتے ٹائروں سے خوف آیا

پہلے جی چاہا میں یقیں کر لوں

پھر ترے شعبدوں سے خوف آیا