" افشاں" سونے یا سنہری بُرادے کو کہتے ہیں جو عورتیں سنگھار کے طور پر مانگ میں یا ماتھے پر چھڑکتی ہیں۔ خاص طور پر دلہن کی مانگ میں افشاں سجائ یا  "چُنی" جاتی تھی ۔ قمر جلالوی کا شعر ہے : 
قمرؔ افشاں چُنی ہے رخ پہ اس نے اس سلیقہ سے
ستارے آسماں سے دیکھنے کو آئے جاتے ہیں
  اردو میں لفظ 'افشاں' چھڑکنے، جھڑنے یا بکھیرنے کے معنوں میں لاحقے کے طور پر بھی استعمال ہوتا ہے۔ لڑکیوں کے نام "مہر افشاں" (محبت بکھیرنے والی ) اور نور افشاں رکھے جاتے ہیں ۔ کسی شعر میں آسمان کسی کی قبر پر " شبنم افشانی" کرتا ہے تو کہیں کسی کی باتوں سے "گُل افشانی" ہوتی ہے. یعنی پھول بکھیرے جاتے ہیں . 
غالب کا مشہور شعر ہے: 
پھر دیکھئیے اندازِ گُل افشانیِ گُفتار
رکھ دے کوئی پیمانۂ صہبا مرے آگے
" گُل افشانیِ گُفتار‘‘ کے لیے اردو میں ’’پھول جھڑنے‘‘ کا محاورہ بھی موجود ہے۔ احمد فرازکا ایک شعر بہت مشہور ہوا ہے ۔
سنا ہے بولے تو باتوں سے پھول جھڑتے ہیں
یہ بات ہے تو چلو بات کر کے دیکھتے ہیں 
اور ایک لفظ ہے "اِفشا" جس  کے معنی ہیں بھید کھل جانا یا ظاہر ہو جانا۔ اردو شاعری میں ہزاروں اشعار نگاہوں سے رازِ عشق اِفشا ہونے کا حال بیان کرتے ہیں۔ اور جرم کا  بھید جاننے کے لئے تھانے میں "تفتیش" بھی کی جاتی ہے ۔ 
 

عشق کے حوالے سے شمع اور پروانہ کے بزاروں ایک سے بڑھ کر ایک  شعر اردو شاعری میں بھرے پڑے ہیں۔ 
پروانوں کا تو حشر جو ہونا تھا ہو چکا 
گزری ہے رات شمع پہ کیا دیکھتے چلیں 
شاد عظیم آبادی
لیکن اردو میں ایک اور  بھی "پروانہ" ہے جو پتنگا نہیں ہے نہ ہی اس کا شمع سے کوئ تعلق ہے۔ اس لفظ پروانہ کے معنی ہیں اجازت نامہ، منظوری، سرکاری یا شاہی حکم اور وارنٹ وغیرہ اس قانونی لفظ کو شاعری سے کیا لینا دینا؟ 
لیکن اکبر الہ آبادی  سرسید کے تعلیمی مشن اور انگریزی صاحبوں کی خوشنودی پر طنز کے تیر چلاتے ہوئے اس قانونی 'پروانے' کو بھی شاعری میں لے ہی آئے اور وہ بھی انگریزی الفاظ  loyalty اور honour کے ساتھ۔ 
دلا دے ہم کو بھی صاحب سے لوئلٹی کا پروانہ 
قیامت تک رہے سید ترے آنر کا افسانہ 
اس کے علاوہ اردو لغت  میں یہ بھی ملتا ہے کہ پروانہ ایک چھوٹا سا جانور بھی ہوتا ہے جس کے متعلق مشہور ہے کہ شیر کے آگے آگے چیختا ہوا چلتا ہے تاکہ دوسرے جانور شیر کی موجودگی سے خبر دار ہو کے چھپ جائیں۔ ہوسکتا ہے کوئ شاعر اس پر بھی شعر لکھ دے۔

کیا آپ جانتے ہیں کہ نقلی کرنسی بنانے اور لفظ "قلب" یعنی دل کا کیا تعلق ہے۔ نقلی کرنسی بنانے کو "قلب سازی" کہتے ہیں۔ سننے میں تو یہ کوئی نئ میڈیکل اصطلاح لگتی ہے نا؟ یہ عربی لفظ قلب اور فارسی لفظ "سازی" یعنی بنانے سے مل کر بنی ہے۔ لفظ قلب  عام طور پر دل کے لئے استعمال ہوتا ہے۔ لیکن لفظ  قلب کے ایک معنی اور بھی ہیں۔ کسی چیز کو الٹ دینا، الٹ جانا، ہیئت کا بالکل تبدیل ہو جانا۔ اس معنی کی روشنی میں نقلی کرنسی بنانے کی اصطلاح "قلب سازی" سمجھی جاسکتی ہے۔

    میاں داد خاں سیاح (1829/30-1907 )اردو کے نامور، منچلے، سیر وسیاحت کے شوقین شاعر تھے۔ ان پر جعلی نوٹ چھاپنے کے جرم میں  "مقدمۂ قلب سازی" چلا تھا اور انھیں چودہ سال سزائے قید ہوئی تھی۔ ملکۂ وکٹوریہ کی سلور جوبلی کے موقع پر انھوں نےملکہ کی شان میں ایک  قصیدہ لکھ کر بھجوایا، جس کے صلے میں ان کی سزا کئی سال کم کردی گئ تھی۔