libas tan pe salamat hain hath Khaali hain

libās tan pe salāmat haiñ haath ḳhālī haiñ

ham ek mulk-e-ḳhudā-dād ke savālī haiñ

na ham meñ aql-o-farāsat na hikmat-o-tadbīr

magar hai zo.am ki jam.iyyat-e-misālī haiñ

munāfiqat ne lahū tan meñ itnā garmāyā

ki guftugū meñ riyā-kāriyāñ sajā lī haiñ

ḳhud apne aap se kad is qadar hameñ hai ki ab

rivāyateñ hī gulistāñ kī phūñk Daalī haiñ

hamāre dil haiñ ab āmāj-gāh-e-hirs-o-havas

ki ham ne sīnoñ meñ tārīkiyāñ ugā lī haiñ

nashemanoñ ko ujāḌā kuchh is tarah jaise

ki fāḳhtā.eñ daraḳhtoñ se uḌne vaalī haiñ

kisī ġharīb apāhij faqīr kī 'mohsin'

kisī amiir ne baisākhiyāñ churā lī haiñ

libas tan pe salamat hain hath KHali hain

hum ek mulk-e-KHuda-dad ke sawali hain

na hum mein aql-o-farasat na hikmat-o-tadbir

magar hai zoam ki jamiyyat-e-misali hain

munafiqat ne lahu tan mein itna garmaya

ki guftugu mein riya-kariyan saja li hain

KHud apne aap se kad is qadar hamein hai ki ab

riwayaten hi gulistan ki phunk Dali hain

hamare dil hain ab aamaj-gah-e-hirs-o-hawas

ki hum ne sinon mein tarikiyan uga li hain

nashemanon ko ujaDa kuchh is tarah jaise

ki faKHtaen daraKHton se uDne wali hain

kisi gharib apahij faqir ki 'mohsin'

kisi amir ne baisakhiyan chura li hain