masjid ke zer-e-saya KHarabaat chahiye

masjid ke zer-e-sāya ḳharābāt chāhiye

bhauñ paas aañkh qibla-e-hājāt chāhiye

āshiq hue haiñ aap bhī ek aur shaḳhs par

āḳhir sitam kī kuchh to mukāfāt chāhiye

de daad ai falak dil-e-hasrat-parast kī

haañ kuchh na kuchh talāfī-e-māfāt chāhiye

sīkhe haiñ mah-ruḳhoñ ke liye ham musavvarī

taqrīb kuchh to bahr-e-mulāqāt chāhiye

mai se ġharaz nashāt hai kis rū-siyāh ko

ik-gūna be-ḳhudī mujhe din raat chāhiye

nashv-o-numā hai asl se 'ġhālib' furūa ko

ḳhāmoshī hī se nikle hai jo baat chāhiye

hai rañg-e-lāla-o-gul-o-nasrīñ judā judā

har rañg meñ bahār kā isbāt chāhiye

sar pā-e-ḳhum pe chāhiye hañgām-e-be-ḳhudī

rū sū-e-qibla vaqt-e-munājāt chāhiye

ya.anī ba-hasb-e-gardish-e-paimāna-e-sifāt

aarif hamesha mast-e-mai-e-zāt chāhiye

masjid ke zer-e-saya KHarabaat chahiye

bhaun pas aankh qibla-e-hajat chahiye

aashiq hue hain aap bhi ek aur shaKHs par

aaKHir sitam ki kuchh to mukafat chahiye

de dad ai falak dil-e-hasrat-parast ki

han kuchh na kuchh talafi-e-mafat chahiye

sikhe hain mah-ruKHon ke liye hum musawwari

taqrib kuchh to bahr-e-mulaqat chahiye

mai se gharaz nashat hai kis ru-siyah ko

ik-guna be-KHudi mujhe din raat chahiye

nashw-o-numa hai asl se 'ghaalib' furua ko

KHamoshi hi se nikle hai jo baat chahiye

hai rang-e-lala-o-gul-o-nasrin juda juda

har rang mein bahaar ka isbaat chahiye

sar pa-e-KHum pe chahiye hangam-e-be-KHudi

ru su-e-qibla waqt-e-munajat chahiye

yani ba-hasb-e-gardish-e-paimana-e-sifat

aarif hamesha mast-e-mai-e-zat chahiye