pachhtaoge phir humse shararat nahin achchhi

pachhtāoge phir ham se sharārat nahīñ achchhī

ye shoḳh-nigāhī dam-e-ruḳhsat nahīñ achchhī

sach ye hai ki ghar se tire jannat nahīñ achchhī

hūroñ kī tire sāmne sūrat nahīñ achchhī

bhūle se kahā maan bhī lete haiñ kisī kā

har baat meñ takrār kī aadat nahīñ achchhī

kyuuñ kal kī tarah vasl meñ tashvīsh hai itnī

tum aaj bhī kah do ki tabī.at nahīñ achchhī

jab itnī samajh hai to samajh kyuuñ nahīñ jaate

maiñ bhī yahī kahtā huuñ ki hujjat nahīñ achchhī

hūroñ kī taraf aañkh uThā kar bhī na dekhā

kyuuñ ab bhī kahoge tirī nīyat nahīñ achchhī

pahuñchā hai qayāmat meñ bhī afsāna-e-ulfat

itnī bhī kisī baat kī shohrat nahīñ achchhī

ham aib samajhte haiñ har ik apne hunar ko

kyā kījiye majbūr haiñ qismat nahīñ achchhī

mil aa.iye dekh aa.iye aaj aap bhī jā kar

'beḳhud' kī ka.ī roz se hālat nahīñ achchhī

pachhtaoge phir hum se shararat nahin achchhi

ye shoKH-nigahi dam-e-ruKHsat nahin achchhi

sach ye hai ki ghar se tere jannat nahin achchhi

huron ki tere samne surat nahin achchhi

bhule se kaha man bhi lete hain kisi ka

har baat mein takrar ki aadat nahin achchhi

kyun kal ki tarah wasl mein tashwish hai itni

tum aaj bhi kah do ki tabiat nahin achchhi

jab itni samajh hai to samajh kyun nahin jate

main bhi yahi kahta hun ki hujjat nahin achchhi

huron ki taraf aankh uTha kar bhi na dekha

kyun ab bhi kahoge teri niyat nahin achchhi

pahuncha hai qayamat mein bhi afsana-e-ulfat

itni bhi kisi baat ki shohrat nahin achchhi

hum aib samajhte hain har ek apne hunar ko

kya kijiye majbur hain qismat nahin achchhi

mil aaiye dekh aaiye aaj aap bhi ja kar

'beKHud' ki kai roz se haalat nahin achchhi