shikwa na raqibon se na jaanan se gila hai

shikva na raqīboñ se na jānāñ se gilā hai

mujh ko faqat apnī dil-e-nādāñ se gilā hai

yuuñ ḳhāk-basar mujh ko na karnā thā jahāñ meñ

ai yaar tirī zulf-e-pareshāñ se gilā hai

bīmār-e-mohabbat kī ayādat ko na aa.e

kyā hijr davā thā mujhe darmāñ se gilā hai

aañsū jo na bahte to maiñ āñkhoñ se na girtā

mujh ko bahut is dīda-e-giryāñ se gilā hai

dam-bhar nahīñ lagtī hai palak se palak apnī

ginvātī hai taare shab-e-hijrāñ se gilā hai

aa.e bhī to khaa.e na gilaurī na malā itr

rokī mirī dāvat mujhe mehmāñ se gilā hai

baḳhiye kī havas rah ga.ī afgār diloñ ko

har zaḳhm ko us sozan-e-mizhgāñ se gilā hai

gul-bū na kabhī laa.e shikāyat hai sabā hai

bhejā na koī phuul gulistāñ se gilā hai

naġhme na sunā.e kabhī ahbāb-e-qafas ko

gulzār ke murġhān-e-ḳhush-alhāñ se gilā hai

rahne ko Thikānā nahīñ miltā kahīñ us ko

majnūñ ko tire gosha-e-zindāñ se gilā hai

soyā na kabhī chāñdnī meñ saath hamāre

ham ko yahī is māh-e-daraḳhshāñ se gilā hai

rokā mujhe aġhyār ko jaane diyā ghar meñ

shikva sag-e-jānāñ se hai darbāñ se gila hai

is se huī furqat na huī in meñ judā.ī

ai 'bahr' mujhe apne tan-o-jāñ se gilā hai

shikwa na raqibon se na jaanan se gila hai

mujh ko faqat apni dil-e-nadan se gila hai

yun KHak-basar mujh ko na karna tha jahan mein

ai yar teri zulf-e-pareshan se gila hai

bimar-e-mohabbat ki ayaadat ko na aae

kya hijr dawa tha mujhe darman se gila hai

aansu jo na bahte to main aankhon se na girta

mujh ko bahut is dida-e-giryan se gila hai

dam-bhar nahin lagti hai palak se palak apni

ginwati hai tare shab-e-hijran se gila hai

aae bhi to khae na gilauri na mala itr

roki meri dawat mujhe mehman se gila hai

baKHiye ki hawas rah gai afgar dilon ko

har zaKHm ko us sozan-e-mizhgan se gila hai

gul-bu na kabhi lae shikayat hai saba hai

bheja na koi phul gulistan se gila hai

naghme na sunae kabhi ahbab-e-qafas ko

gulzar ke murghan-e-KHush-alhan se gila hai

rahne ko Thikana nahin milta kahin us ko

majnun ko tere gosha-e-zindan se gila hai

soya na kabhi chandni mein sath hamare

hum ko yahi is mah-e-daraKHshan se gila hai

roka mujhe aghyar ko jaane diya ghar mein

shikwa sag-e-jaanan se hai darban se gila hai

is se hui furqat na hui in mein judai

ai 'bahr' mujhe apne tan-o-jaan se gila hai