sikandar hun talash-e-ab-e-haiwan roz karta hun

sikandar huuñ talāsh-e-āb-e-haivāñ roz kartā huuñ

abhī naqsh-o-nigār-e-zindagī meñ rañg bhartā huuñ

lagā kar sab lahū āḳhir hue dāḳhil shahīdoñ meñ

maiñ apnī laash raste se haTāne tak se Dartā huuñ

parā.ī aag gar hotī to kab kī jal bujhī hotī

maiñ hañste khelte mauj-e-havādis se guzartā huuñ

yaqīnan maut ke har aks par vo ḳhaak Dālegā

duā se jis kī maiñ ab tak na jiitā huuñ na martā huuñ

kabhī merī talab kachche ghaḌe par paar utartī hai

kabhī mahfūz kashtī meñ safar karne se Dartā huuñ

tumhārā izn ho hāsil to dariyā rāsta deñge

jahāñ fir.aun Duubā thā vahīñ pe paar utrā huuñ

'farīd' us kī talab mujh ko jhāñktī hai kueñ aksar

vo chehra jis kī chāhat meñ maiñ kyā kyā kar guzartā huuñ

sikandar hun talash-e-ab-e-haiwan roz karta hun

abhi naqsh-o-nigar-e-zindagi mein rang bharta hun

laga kar sab lahu aaKHir hue daKHil shahidon mein

main apni lash raste se haTane tak se Darta hun

parai aag gar hoti to kab ki jal bujhi hoti

main hanste khelte mauj-e-hawadis se guzarta hun

yaqinan maut ke har aks par wo KHak Dalega

dua se jis ki main ab tak na jita hun na marta hun

kabhi meri talab kachche ghaDe par par utarti hai

kabhi mahfuz kashti mein safar karne se Darta hun

tumhaara izn ho hasil to dariya rasta denge

jahan firaun Duba tha wahin pe par utra hun

'farid' us ki talab mujh ko jhankti hai kuen aksar

wo chehra jis ki chahat mein main kya kya kar guzarta hun