tujhe kya KHabar mere be-KHabar mera silsila koi aur hai

tujhe kyā ḳhabar mire be-ḳhabar mirā silsila koī aur hai

jo mujhī ko mujh se baham kare vo gurez-pā koī aur hai

mire mausamoñ ke bhī taur the mire barg-o-bār hī aur the

magar ab ravish hai alag koī magar ab havā koī aur hai

yahī shahr shahr-e-qarār hai to dil-e-shikasta kī ḳhair ho

mirī aas hai kisī aur se mujhe pūchhtā koī aur hai

ye vo mājrā-e-firāq hai jo mohabbatoñ se na khul sakā

ki mohabbatoñ hī ke darmiyāñ sabab-e-jafā koī aur hai

haiñ mohabbatoñ kī amānateñ yahī hijrateñ yahī qurbateñ

diye bām-o-dar kisī aur ne to rahā basā koī aur hai

ye fazā ke rañg khule khule isī pesh-o-pas ke haiñ silsile

abhī ḳhush-navā koī aur thā abhī par-kushā koī aur hai

dil-e-zūd-ranj na kar gila kisī garm o sard raqīb kā

ruḳh-e-nā-sazā to hai rū-ba-rū pas-e-nā-sazā koī aur hai

bahut aa.e hamdam o chāra-gar jo numūd-o-nām ke ho ga.e

jo zavāl-e-ġham kā bhī ġham kare vo ḳhush-āshnā koī aur hai

ye 'nasīr' shām-e-supurdagī kī udaas udaas sī raushnī

ba-kanār-e-gul zarā dekhnā ye tumhī ho yā koī aur hai

tujhe kya KHabar mere be-KHabar mera silsila koi aur hai

jo mujhi ko mujh se baham kare wo gurez-pa koi aur hai

mere mausamon ke bhi taur the mere barg-o-bar hi aur the

magar ab rawish hai alag koi magar ab hawa koi aur hai

yahi shahr shahr-e-qarar hai to dil-e-shikasta ki KHair ho

meri aas hai kisi aur se mujhe puchhta koi aur hai

ye wo majra-e-firaq hai jo mohabbaton se na khul saka

ki mohabbaton hi ke darmiyan sabab-e-jafa koi aur hai

hain mohabbaton ki amanaten yahi hijraten yahi qurbaten

diye baam-o-dar kisi aur ne to raha basa koi aur hai

ye faza ke rang khule khule isi pesh-o-pas ke hain silsile

abhi KHush-nawa koi aur tha abhi par-kusha koi aur hai

dil-e-zud-ranj na kar gila kisi garm o sard raqib ka

ruKH-e-na-saza to hai ru-ba-ru pas-e-na-saza koi aur hai

bahut aae hamdam o chaara-gar jo numud-o-nam ke ho gae

jo zawal-e-gham ka bhi gham kare wo KHush-ashna koi aur hai

ye 'nasir' sham-e-supurdagi ki udas udas si raushni

ba-kanar-e-gul zara dekhna ye tumhi ho ya koi aur hai