wo chup ho gae mujhse kya kahte kahte

vo chup ho ga.e mujh se kyā kahte kahte

ki dil rah gayā mudda.ā kahte kahte

mirā ishq bhī ḳhud-ġharaz ho chalā hai

tire husn ko bevafā kahte kahte

shab-e-ġham kis ārām se so ga.e haiñ

fasāna tirī yaad kā kahte kahte

ye kyā paḌ ga.ī ḳhū-e-dushnām tum ko

mujhe nā-sazā barmalā kahte kahte

ḳhabar un ko ab tak nahīñ mar miTe ham

dil-e-zār kā mājrā kahte kahte

ajab kyā jo hai bad-gumāñ sab se vaa.iz

burā sunte sunte burā kahte kahte

vo aa.e magar aa.e kis vaqt 'hasrat'

ki ham chal base marhabā kahte kahte

wo chup ho gae mujh se kya kahte kahte

ki dil rah gaya muddaa kahte kahte

mera ishq bhi KHud-gharaz ho chala hai

tere husn ko bewafa kahte kahte

shab-e-gham kis aaram se so gae hain

fasana teri yaad ka kahte kahte

ye kya paD gai KHu-e-dushnam tum ko

mujhe na-saza barmala kahte kahte

KHabar un ko ab tak nahin mar miTe hum

dil-e-zar ka majra kahte kahte

ajab kya jo hai bad-guman sab se waiz

bura sunte sunte bura kahte kahte

wo aae magar aae kis waqt 'hasrat'

ki hum chal base marhaba kahte kahte