urdu

urdu hai mirā naam maiñ 'ḳhusrav' kī pahelī

maiñ 'mīr' kī hamrāz huuñ 'ġhālib' kī sahelī

dakkan ke 'valī' ne mujhe godī meñ khelāyā

'saudā' ke qasīdoñ ne mirā husn baḌhāyā

hai 'mīr' kī azmat ki mujhe chalnā sikhāyā

maiñ daaġh ke āñgan meñ khilī ban ke chamelī

urdu hai mirā naam maiñ 'ḳhusrav' kī pahelī

'ġhālib' ne bulandī kā safar mujh ko sikhāyā

'hālī' ne muravvat kā sabaq yaad dilāyā

'iqbāl' ne ā.īna-e-haq mujh ko dikhāyā

'momin' ne sajā.ī mire ḳhvāboñ kī havelī

urdu hai mirā naam maiñ 'ḳhusrav' kī pahelī

hai 'zauq' kī azmat ki diye mujh ko sahāre

'chakbast' kī ulfat ne mire ḳhvāb sañvāre

'fānī' ne sajā.e mirī palkoñ pe sitāre

'akbar' ne rachā.ī mirī be-rañg hathelī

urdu hai mirā naam maiñ 'ḳhusrav' kī pahelī

kyuuñ mujh ko banāte ho ta.assub kā nishāna

maiñ ne to kabhī ḳhud ko musalmāñ nahīñ maanā

dekhā thā kabhī maiñ ne bhī ḳhushiyoñ kā zamāna

apne hī vatan meñ huuñ magar aaj akelī

urdu hai mirā naam maiñ 'ḳhusrav' kī pahelī

urdu hai mera nam main 'KHusraw' ki paheli

main 'mir' ki hamraaz hun 'ghaalib' ki saheli

dakkan ke 'wali' ne mujhe godi mein khelaya

'sauda' ke qasidon ne mera husn baDhaya

hai 'mir' ki azmat ki mujhe chalna sikhaya

main dagh ke aangan mein khili ban ke chameli

urdu hai mera nam main 'KHusraw' ki paheli

'ghaalib' ne bulandi ka safar mujh ko sikhaya

'haali' ne murawwat ka sabaq yaad dilaya

'iqbaal' ne aaina-e-haq mujh ko dikhaya

'momin' ne sajai mere KHwabon ki haweli

urdu hai mera nam main 'KHusraw' ki paheli

hai 'zauq' ki azmat ki diye mujh ko sahaare

'chakbast' ki ulfat ne mere KHwab sanware

'fani' ne sajae meri palkon pe sitare

'akbar' ne rachai meri be-rang hatheli

urdu hai mera nam main 'KHusraw' ki paheli

kyun mujh ko banate ho tassub ka nishana

main ne to kabhi KHud ko musalman nahin mana

dekha tha kabhi main ne bhi KHushiyon ka zamana

apne hi watan mein hun magar aaj akeli

urdu hai mera nam main 'KHusraw' ki paheli