Sher on Safar

mujhe ḳhabar thī mirā intizār ghar meñ rahā

ye hādsa thā ki maiñ umr bhar safar meñ rahā

mujhe KHabar thi mera intizar ghar mein raha

ye hadsa tha ki main umr bhar safar mein raha

zindagī yuuñ huī basar tanhā

qāfila saath aur safar tanhā

zindagi yun hui basar tanha

qafila sath aur safar tanha

safar meñ dhuup to hogī jo chal sako to chalo

sabhī haiñ bhiiḌ meñ tum bhī nikal sako to chalo

safar mein dhup to hogi jo chal sako to chalo

sabhi hain bhiD mein tum bhi nikal sako to chalo

jab yahāñ rahne ke sab asbāb yakjā kar liye

tab khulā mujh par ki maiñ duniyā kā bāshinda na thā

jab yahan rahne ke sab asbab yakja kar liye

tab khula mujh par ki main duniya ka bashinda na tha

duā ye hai na hoñ gumrāh ham-safar mere

'ḳhumār' maiñ ne to apnā safar tamām kiyā

dua ye hai na hon gumrah ham-safar mere

'KHumar' main ne to apna safar tamam kiya

safar meñ tanhā qadam uThānā mushkil hai

saath tumhāre kabhī na thakne vaalā maiñ

safar mein tanha qadam uThana mushkil hai

sath tumhaare kabhi na thakne wala main

ġharaz rahī na kabhī manziloñ se koī hameñ

hamesha apne hī andar safar hamārā huā

gharaz rahi na kabhi manzilon se koi hamein

hamesha apne hi andar safar hamara hua

hai koī jo batā.e shab ke musāfiroñ ko

kitnā safar huā hai kitnā safar rahā hai

hai koi jo batae shab ke musafiron ko

kitna safar hua hai kitna safar raha hai

ye baat yaad rakheñge talāshne vaale

jo us safar pe ga.e lauT kar nahīñ aa.e

ye baat yaad rakhenge talashne wale

jo us safar pe gae lauT kar nahin aae

hone ko is safar meñ bahut rā.egāñ hue

lekin hameñ shikast kā nauha na jāniye

hone ko is safar mein bahut raegan hue

lekin hamein shikast ka nauha na jaaniye

phir tujhe aur mujhe aur kahīñ jaanā hai

ham-safar saath to chal jitnī saḌak baaqī hai

phir tujhe aur mujhe aur kahin jaana hai

ham-safar sath to chal jitni saDak baqi hai

go aable haiñ paañv meñ phir bhī ai rahravo

manzil kī justujū hai to jaarī rahe safar

go aable hain panw mein phir bhi ai rahrawo

manzil ki justuju hai to jari rahe safar

'asġhar' ye safar shauq kā ab kaise kaTegā

jo ham ne tarāshā thā vo but TuuT gayā hai

'asghar' ye safar shauq ka ab kaise kaTega

jo hum ne tarasha tha wo but TuT gaya hai

ik muddat kā pyāsā ye kaise samjhe

dariyā ke aage bhī rasta jaatā hai

ek muddat ka pyasa ye kaise samjhe

dariya ke aage bhi rasta jata hai

kaun rahtā hai safar meñ 'umr bhar

mustaqil koī Thikānā chāhiye

kaun rahta hai safar mein 'umr bhar

mustaqil koi Thikana chahiye

kis kī talāsh hai hameñ kis ke asar meñ haiñ

jab se chale haiñ ghar se musalsal safar meñ haiñ

kis ki talash hai hamein kis ke asar mein hain

jab se chale hain ghar se musalsal safar mein hain

kabhī kisī kā tajassus kabhī ḳhud apnī talāsh

ajiib dil hai hamesha safar meñ rahtā hai

kabhi kisi ka tajassus kabhi KHud apni talash

ajib dil hai hamesha safar mein rahta hai

apnī sī ḳhaak uḌā ke baiTh rahe

apnā sā qāfila banāte hue

apni si KHak uDa ke baiTh rahe

apna sa qafila banate hue

rasta bhī hamī log the raahī bhī hamīñ the

aur apnī masāfat kī gavāhī bhī hamīñ the

rasta bhi hami log the rahi bhi hamin the

aur apni masafat ki gawahi bhi hamin the

maiñ akelā hī chalā thā jānib-e-manzil magar

log saath aate ga.e aur kārvāñ bantā gayā

main akela hi chala tha jaanib-e-manzil magar

log sath aate gae aur karwan banta gaya

Dar ham ko bhī lagtā hai raste ke sannāTe se

lekin ek safar par ai dil ab jaanā to hogā

Dar hum ko bhi lagta hai raste ke sannaTe se

lekin ek safar par ai dil ab jaana to hoga

abhī se shikva-e-past-o-buland ham-safro

abhī to raah bahut saaf hai abhī kyā hai

abhi se shikwa-e-past-o-buland ham-safro

abhi to rah bahut saf hai abhi kya hai

fikr-e-manzil hai na hosh-e-jāda-e-manzil mujhe

jā rahā huuñ jis taraf le jā rahā hai dil mujhe

fikr-e-manzil hai na hosh-e-jada-e-manzil mujhe

ja raha hun jis taraf le ja raha hai dil mujhe

safar meñ koī kisī ke liye Thahartā nahīñ

na muḌ ke dekhā kabhī sāhiloñ ko dariyā ne

safar mein koi kisi ke liye Thaharta nahin

na muD ke dekha kabhi sahilon ko dariya ne

na ranj-e-hijrat thā aur na shauq-e-safar thā dil meñ

sab apne apne gunāh kā bojh Dho rahe the

na ranj-e-hijrat tha aur na shauq-e-safar tha dil mein

sab apne apne gunah ka bojh Dho rahe the

maiñ haar jaatā huuñ un do udaas āñkhoñ se

mujhe safar kā irāda badalnā paḌtā hai

main haar jata hun un do udas aankhon se

mujhe safar ka irada badalna paDta hai

tumhārā gaañv aa.egā safar meñ

so khiḌkī kī taraf baiThe nahīñ ham

tumhaara ganw aaega safar mein

so khiDki ki taraf baiThe nahin hum

maiñ lauTne ke irāde se jā rahā huuñ magar

safar safar hai mirā intizār mat karnā

main lauTne ke irade se ja raha hun magar

safar safar hai mera intizar mat karna

chale the jis kī taraf vo nishān ḳhatm huā

safar adhūrā rahā āsmān ḳhatm huā

chale the jis ki taraf wo nishan KHatm hua

safar adhura raha aasman KHatm hua

safar āvārgī kā hai 'valīd' ab sochnā kaisā

añdherī raat Dhalne par kabhī maiñ ghar bhī dekhūñgā

safar aawargi ka hai 'walid' ab sochna kaisa

andheri raat Dhalne par kabhi main ghar bhi dekhunga

pahle paḌhne ke liye shahroñ kī jānib chal paḌā

ab ke hijrat kar rahā huuñ kuchh kamāne ke liye

pahle paDhne ke liye shahron ki jaanib chal paDa

ab ke hijrat kar raha hun kuchh kamane ke liye

musāfirat kā valvala siyāhatoñ kā mashġhala

jo tum meñ kuchh ziyāda hai safar karo safar karo

musafirat ka walwala siyahaton ka mashghala

jo tum mein kuchh ziyaada hai safar karo safar karo

'ḳhumār' aise safar meñ aañkh chhin jaatī to achchhā thā

kahīñ shāḳhoñ kā saudā aur kahīñ dekhā shajar luTtā

'KHumar' aise safar mein aankh chhin jati to achchha tha

kahin shaKHon ka sauda aur kahin dekha shajar luTta

raah ke naqsh-e-pā batāte haiñ

bojh kitnā thā us musāfir par

rah ke naqsh-e-pa batate hain

bojh kitna tha us musafir par

na manziloñ ko na ham rahguzar ko dekhte haiñ

ajab safar hai ki bas ham-safar ko dekhte haiñ

na manzilon ko na hum rahguzar ko dekhte hain

ajab safar hai ki bas ham-safar ko dekhte hain

ek muddat se apne ghar meñ haiñ

phir bhī lagtā hai ham safar meñ haiñ

ek muddat se apne ghar mein hain

phir bhi lagta hai hum safar mein hain

is safar meñ niiñd aisī kho ga.ī

ham na so.e raat thak kar so ga.ī

is safar mein nind aisi kho gai

hum na soe raat thak kar so gai

kabhī merī talab kachche ghaḌe par paar utartī hai

kabhī mahfūz kashtī meñ safar karne se Dartā huuñ

kabhi meri talab kachche ghaDe par par utarti hai

kabhi mahfuz kashti mein safar karne se Darta hun

nahīñ hotī hai rāh-e-ishq meñ āsān manzil

safar meñ bhī to sadiyoñ kī masāfat chāhiye hai

nahin hoti hai rah-e-ishq mein aasan manzil

safar mein bhi to sadiyon ki masafat chahiye hai

vo lutf uThā.egā safar kā

āp-apne meñ jo safar karegā

wo lutf uThaega safar ka

aap-apne mein jo safar karega

ek safar vo hai jis meñ

paañv nahīñ dil thaktā hai

ek safar wo hai jis mein

panw nahin dil thakta hai

vo ik safar jo hameñ zindagī kī shakl milā

us ik safar ke ka.ī marhale banāne paḌe

wo ek safar jo hamein zindagi ki shakl mila

us ek safar ke kai marhale banane paDe

maiñ safar meñ huuñ magar samt-e-safar koī nahīñ

kyā maiñ ḳhud apnā hī naqsh-e-kaf-e-pā huuñ kyā huuñ

main safar mein hun magar samt-e-safar koi nahin

kya main KHud apna hi naqsh-e-kaf-e-pa hun kya hun

'bedī' marīz dil kā huuñ aur dard kā safīr

mar jā.ūñgā na us ne agar dekh-bhāl kī

'bedi' mariz dil ka hun aur dard ka safir

mar jaunga na us ne agar dekh-bhaal ki

guzar kar dasht se 'sālim' junūñ ke

safar kī aabrū ho jā.ūñgā maiñ

guzar kar dasht se 'salim' junun ke

safar ki aabru ho jaunga main

abhī safar meñ koī moḌ hī nahīñ aayā

nikal gayā hai ye chup-chāp dāstān se kaun

abhi safar mein koi moD hi nahin aaya

nikal gaya hai ye chup-chap dastan se kaun

safar meñ aise ka.ī marhale bhī aate haiñ

har ek moḌ pe kuchh log chhūT jaate haiñ

safar mein aise kai marhale bhi aate hain

har ek moD pe kuchh log chhuT jate hain

raah āsāñ dekh kar sab ḳhush the phir maiñ ne kahā

soch liije ek andāz-e-nazar merā bhī hai

rah aasan dekh kar sab KHush the phir main ne kaha

soch lije ek andaz-e-nazar mera bhi hai

tanhā.iyāñ safar meñ musalsal banī rahīñ

phir bhī tumhārā naam pukāre chale ga.e

tanhaiyan safar mein musalsal bani rahin

phir bhi tumhaara nam pukare chale gae

ajiib baat hai tum saath chal nahīñ paate

hamāre saath to raste bhī chalne lagte haiñ

ajib baat hai tum sath chal nahin pate

hamare sath to raste bhi chalne lagte hain