badan mein jaise lahu taziyana ho gaya hai

badan meñ jaise lahū tāziyāna ho gayā hai

use gale se lagā.e zamāna ho gayā hai

chamak rahā hai ufuq tak ġhubār-e-tīra-shbī

koī charāġh safar par ravāna ho gayā hai

hameñ to ḳhair bikharnā hī thā kabhī na kabhī

havā-e-tāza kā jhoñkā bahāna ho gayā hai

ġharaz ki pūchhte kyā ho ma.āl-e-soḳhtagāñ

tamām jalnā jalānā fasāna ho gayā hai

fazā-e-shauq meñ us kī bisāt hī kyā thī

parind apne paroñ kā nishāna ho gayā hai

kisī ne dekhe haiñ patjhaḌ meñ phuul khilte hue

dil apnī ḳhush-nazarī meñ divāna ho gayā hai

badan mein jaise lahu taziyana ho gaya hai

use gale se lagae zamana ho gaya hai

chamak raha hai ufuq tak ghubar-e-tira-shbi

koi charagh safar par rawana ho gaya hai

hamein to KHair bikharna hi tha kabhi na kabhi

hawa-e-taza ka jhonka bahana ho gaya hai

gharaz ki puchhte kya ho maal-e-soKHtagan

tamam jalna jalana fasana ho gaya hai

faza-e-shauq mein us ki bisat hi kya thi

parind apne paron ka nishana ho gaya hai

kisi ne dekhe hain patjhaD mein phul khilte hue

dil apni KHush-nazari mein diwana ho gaya hai