tare jo kabhi ashk-fishani se nikalte

taare jo kabhī ashk-fishānī se nikalte

ham chāñd uThā.e hue paanī se nikalte

ḳhāmosh sahī markazī kirdār to ham the

phir kaise bhalā terī kahānī se nikalte

mohlat hī na dī gardish-e-aflāk ne ham ko

kyā silsila-e-naql-e-makānī se nikalte

ik umr lagī terī kushāda-nazrī meñ

is tañgi-e-dāmāñ ko girānī se nikalte

bas ek hī mausam kā tasalsul hai ye duniyā

kyā hijr-zada ḳhvāb-e-javānī se nikalte

vo vaqt bhī guzrā hai ki dekhā nahīñ tum ne

sahrāoñ ko dariyā kī ravānī se nikalte

shāyad ki 'salīm' amn kī sūrat nazar aatī

ham log agar shola-bayānī se nikalte

tare jo kabhi ashk-fishani se nikalte

hum chand uThae hue pani se nikalte

KHamosh sahi markazi kirdar to hum the

phir kaise bhala teri kahani se nikalte

mohlat hi na di gardish-e-aflak ne hum ko

kya silsila-e-naql-e-makani se nikalte

ek umr lagi teri kushada-nazri mein

is tangi-e-daman ko girani se nikalte

bas ek hi mausam ka tasalsul hai ye duniya

kya hijr-zada KHwab-e-jawani se nikalte

wo waqt bhi guzra hai ki dekha nahin tum ne

sahraon ko dariya ki rawani se nikalte

shayad ki 'salim' amn ki surat nazar aati

hum log agar shola-bayani se nikalte