aaina tha to jo chehra tha mera apna tha

aa.ina thā to jo chehra thā mirā apnā thā

mujh meñ jo aks bhī utrā thā mirā apnā thā

vo jo aahaT thī koī ruup nahīñ dhaar sakī

vo jo dīvār pe saayā thā mirā apnā thā

vo jo hoñToñ pe tapan sī thī vo merī zid thī

vo jo dariyāoñ pe pahrā thā mirā apnā thā

mere raste meñ jo raunaq thī mere fan kī thī

mere ghar meñ jo añdherā thā mirā apnā thā

ajnabiyyat kā vo ehsās thā merī qismat

vo jo apnā nahīñ lagtā thā mirā apnā thā

merī sochoñ meñ jo manzil thī merī apnī thī

mere qadmoñ meñ jo rasta thā mirā apnā thā

sirf paanī pe to qabza thā mere dushman kā

mujh meñ jo ḳhuun kā dajla thā mirā apnā thā

aaina tha to jo chehra tha mera apna tha

mujh mein jo aks bhi utra tha mera apna tha

wo jo aahaT thi koi rup nahin dhaar saki

wo jo diwar pe saya tha mera apna tha

wo jo honTon pe tapan si thi wo meri zid thi

wo jo dariyaon pe pahra tha mera apna tha

mere raste mein jo raunaq thi mere fan ki thi

mere ghar mein jo andhera tha mera apna tha

ajnabiyyat ka wo ehsas tha meri qismat

wo jo apna nahin lagta tha mera apna tha

meri sochon mein jo manzil thi meri apni thi

mere qadmon mein jo rasta tha mera apna tha

sirf pani pe to qabza tha mere dushman ka

mujh mein jo KHun ka dajla tha mera apna tha