aaj ruswa hain to hum kucha-o-bazar bahut

aaj rusvā haiñ to ham kūcha-o-bāzār bahut

yā kabhī giit bhī gaate the sar-e-dār bahut

apne hālāt ko suljhāo to kuchh baat bane

mil bhī jā.eñge kabhī gesū-e-ḳhamdār bahut

dil ke zaḳhmoñ ko bhī mumkin ho to dekho varna

chāñd se chehre bahut phuul se ruḳhsār bahut

aaj māhaul meñ fitne haiñ sar-e-dair-o-haram

aaj behtar hai parastish ko dar-e-yār bahut

luT ga.e ek hī añgḌā.ī meñ aisā bhī huā

umr-bhar phirte rahe ban ke jo hoshiyār bahut

ajnabī ban ke rahe shahr meñ ham hālāñki

sāya-e-zulf bahut sāya-e-dīvār bahut

'qais' nā-qadrī-e-ahbāb kā shikva hai fuzūl

koī yūsuf hī nahīñ varna ḳharīdār bahut

aaj ruswa hain to hum kucha-o-bazar bahut

ya kabhi git bhi gate the sar-e-dar bahut

apne haalat ko suljhao to kuchh baat bane

mil bhi jaenge kabhi gesu-e-KHamdar bahut

dil ke zaKHmon ko bhi mumkin ho to dekho warna

chand se chehre bahut phul se ruKHsar bahut

aaj mahaul mein fitne hain sar-e-dair-o-haram

aaj behtar hai parastish ko dar-e-yar bahut

luT gae ek hi angDai mein aisa bhi hua

umr-bhar phirte rahe ban ke jo hoshiyar bahut

ajnabi ban ke rahe shahr mein hum haalanki

saya-e-zulf bahut saya-e-diwar bahut

'qais' na-qadri-e-ahbab ka shikwa hai fuzul

koi yusuf hi nahin warna KHaridar bahut