aap nur-afshan hain raat ke andhere mein

aap nūr-afshāñ haiñ raat ke añdhere meñ

yā sitāre raqsāñ haiñ raat ke añdhere meñ

ek din vo zarroñ ko āftāb kar leñge

dhuup ke jo ḳhvāhāñ haiñ raat ke añdhere meñ

kyuuñ nahīñ jalā lete āñsuoñ kī qindīleñ

log kyuuñ hirāsāñ haiñ raat ke añdhere meñ

ḳhaufnāk āvāzeñ vahshiyoñ ke hañgāme

raunaq-e-bayābāñ haiñ raat ke añdhere meñ

raushnī to pahuñchī hai sirf chand logoñ tak

ab bhī kitne insāñ haiñ raat ke añdhere meñ

din kī raushnī meñ jo sab se be-takalluf hai

ham se kyuuñ gurezāñ haiñ raat ke añdhere meñ

tīrgī se laḌne kā hausla nahīñ jin meñ

an ke jism larzāñ haiñ raat ke añdhere meñ

ujle ujle chehroñ par aks dilrubā.ī ke

kis qadar numāyāñ haiñ raat ke añdhere meñ

DhūñDte haiñ sab apne apne ham-navāoñ ko

aa.ine pareshāñ haiñ raat ke añdhere meñ

kis ke naqsh-hā-e-pā rahnumā hue 'ādil'

rāste daraḳhshāñ haiñ raat ke añdhere meñ

aap nur-afshan hain raat ke andhere mein

ya sitare raqsan hain raat ke andhere mein

ek din wo zarron ko aaftab kar lenge

dhup ke jo KHwahan hain raat ke andhere mein

kyun nahin jala lete aansuon ki qindilen

log kyun hirasan hain raat ke andhere mein

KHaufnak aawazen wahshiyon ke hangame

raunaq-e-bayaban hain raat ke andhere mein

raushni to pahunchi hai sirf chand logon tak

ab bhi kitne insan hain raat ke andhere mein

din ki raushni mein jo sab se be-takalluf hai

hum se kyun gurezan hain raat ke andhere mein

tirgi se laDne ka hausla nahin jin mein

an ke jism larzan hain raat ke andhere mein

ujle ujle chehron par aks dilrubai ke

kis qadar numayan hain raat ke andhere mein

DhunDte hain sab apne apne ham-nawaon ko

aaine pareshan hain raat ke andhere mein

kis ke naqsh-ha-e-pa rahnuma hue 'adil'

raste daraKHshan hain raat ke andhere mein