aap shayad bhul baiThe hain yahan main bhi to hun

aap shāyad bhuul baiThe haiñ yahāñ maiñ bhī to huuñ

is zamīñ aur āsmāñ ke darmiyāñ maiñ bhī to huuñ

haisiyat kuchh bhī nahīñ bas ek tinke kī tarah

fikr-o-fan ke is samundar meñ ravāñ maiñ bhī to huuñ

be-sabab be-jurm patthar shāhzādī ban ga.ī

bas yahī thī ik sadā-e-be-zabāñ maiñ bhī to huuñ

inkisārī pā.edārī sab ravā-dārī ga.ī

jab takabbur ne kahā baḌh kar myaañ maiñ bhī to huuñ

aaj is andāz se tum ne mujhe āvāz dī

yak-ba-yak mujh ko ḳhayāl aayā ki haañ maiñ bhī to huuñ

tere sheroñ se mujhe mansūb kar dete haiñ log

naaz hai mujh ko jahāñ tū hai vahāñ maiñ bhī to huuñ

rūThnā kyā hai chalo maiñ hī manā lā.ūñ use

be-ruḳhī se us kī 'nusrat' nīm-jāñ maiñ bhī to huuñ

aap shayad bhul baiThe hain yahan main bhi to hun

is zamin aur aasman ke darmiyan main bhi to hun

haisiyat kuchh bhi nahin bas ek tinke ki tarah

fikr-o-fan ke is samundar mein rawan main bhi to hun

be-sabab be-jurm patthar shahzadi ban gai

bas yahi thi ek sada-e-be-zaban main bhi to hun

inkisari paedari sab rawa-dari gai

jab takabbur ne kaha baDh kar myan main bhi to hun

aaj is andaz se tum ne mujhe aawaz di

yak-ba-yak mujh ko KHayal aaya ki han main bhi to hun

tere sheron se mujhe mansub kar dete hain log

naz hai mujh ko jahan tu hai wahan main bhi to hun

ruThna kya hai chalo main hi mana laun use

be-ruKHi se us ki 'nusrat' nim-jaan main bhi to hun