aashiq-e-zar hun juz ishq mujhe kaam nahin

āshiq-e-zār huuñ juz ishq mujhe kaam nahīñ

tālib-e-kufr nahīñ tābe-e-islām nahīñ

ġham nahīñ kuchh bhī ḳharābī se hai ham mastoñ ko

gardish-e-jām hai ye gardish-e-ayyām nahīñ

qatl-e-āshiq ke liye ek adā bas hai tirī

bismil-e-ishq ko kuchh hājat-e-samsām nahīñ

kyā huā abr bhī hai mai bhī hai sāġhar bhī hai

hai ye sab hech agar sāqī-e-gulfām nahīñ

dekh kar mujh ko tujhe kyuuñ hai tahayyur nāseh

mashrab-e-ishq hai ye maz.hab-e-islām nahīñ

ḳhāna-e-nāz hai vo balki charāġh-e-murdā

dil ke ā.īne meñ gar rū-e-dil-ārām nahīñ

ishq-e-ḳhādim se huā hai dil-e-'āsim' ma.amūr

is liye dīn-o-duniyā se use kaam nahīñ

aashiq-e-zar hun juz ishq mujhe kaam nahin

talib-e-kufr nahin tabe-e-islam nahin

gham nahin kuchh bhi KHarabi se hai hum maston ko

gardish-e-jam hai ye gardish-e-ayyam nahin

qatl-e-ashiq ke liye ek ada bas hai teri

bismil-e-ishq ko kuchh hajat-e-samsam nahin

kya hua abr bhi hai mai bhi hai saghar bhi hai

hai ye sab hech agar saqi-e-gulfam nahin

dekh kar mujh ko tujhe kyun hai tahayyur naseh

mashrab-e-ishq hai ye mazhab-e-islam nahin

KHana-e-naz hai wo balki charagh-e-murda

dil ke aaine mein gar ru-e-dil-aram nahin

ishq-e-KHadim se hua hai dil-e-'asim' mamur

is liye din-o-duniya se use kaam nahin