ab ayaadat ko meri koi nahin aaega

ab ayādat ko mirī koī nahīñ aa.egā

phir huuñ bīmār kisī ko na yaqīñ aa.egā

ġham musalsal ho to ahbāb bichhaḌ jaate haiñ

ab na koī dil-e-tanhā ke qarīñ aa.egā

apne ḳhvāboñ ke darīchoñ meñ jalā lo sham.eñ

aur ye soch lo ik māh-jabīñ aa.egā

phir nigār-e-chaman-e-vādī-e-fardā-e-bahār

gul-ba-dast-e-mah-o-anjum ba-jabīñ aa.egā

zehn-e-tāza ke liye sāz-e-haqīqat chheḌo

chain ise sirf taḳhayyul se kahīñ aa.egā

sirf apne hī azā.em pe bharosa kar le

kaam koī bhī na ai qalb-e-hazīñ aa.egā

roz puujā ke liye phuul sajātā hai 'salām'

jaane kab us kā ḳhudā sū-e-zamīñ aa.egā

ab ayaadat ko meri koi nahin aaega

phir hun bimar kisi ko na yaqin aaega

gham musalsal ho to ahbab bichhaD jate hain

ab na koi dil-e-tanha ke qarin aaega

apne KHwabon ke darichon mein jala lo shamen

aur ye soch lo ek mah-jabin aaega

phir nigar-e-chaman-e-wadi-e-farda-e-bahaar

gul-ba-dast-e-mah-o-anjum ba-jabin aaega

zehn-e-taza ke liye saz-e-haqiqat chheDo

chain ise sirf taKHayyul se kahin aaega

sirf apne hi azaem pe bharosa kar le

kaam koi bhi na ai qalb-e-hazin aaega

roz puja ke liye phul sajata hai 'salam'

jaane kab us ka KHuda su-e-zamin aaega