ahd-e-mayusi jahan tak sazgar aata gaya

ahd-e-māyūsī jahāñ tak sāzgār aatā gayā

apne-āpe meñ dil-e-be-iḳhtiyār aatā gayā

kuchh sukūñ kuchh zabt kuchh rañg-e-qarār aatā gayā

al-ġharaz iḳhfā-e-rāz-e-qurb-e-yār aatā gayā

uḌte uḌte us ke aane kī ḳhabar miltī rahī

baal khole muzhda-e-gesū-e-yār aatā gayā

rafta rafta merī al-ġharzī asar kartī rahī

merī be-parvā.iyoñ par us ko pyaar aatā gayā

jasta jasta lahlahāyā gulshan-e-zaḳhm-e-jigar

rafta rafta dasta-e-gul par nikhār aatā gayā

niiñd āñkhoñ meñ magar aatī ga.ī uḌtī ga.ī

dosh-e-nik.hat par payām-e-zulf-e-yār aatā gayā

us ne jis had tak bhī ham se dāstān-e-ġham sunī

ham ko is nisbat se fan-e-iḳhtisār aatā gayā

ġhāliban ye bhī hai merī kāmyābī kā sabab

apnī nākāmī pe ġhussa baar baar aatā gayā

un meñ shāmil muskurāte phuul bhī taare bhī haiñ

jin darīchoñ se shu.ūr-e-husn-e-yār aatā gayā

aage aage āshiyāne ḳhār-o-ḳhas chunte chale

pīchhe pīchhe taḳht-e-tā.ūs-e-bahār aatā gayā

is qadar nazdīk-tar aatī rahī qadmoñ kī chaap

jis qadar ḳhadsha ḳhilāf-e-intizār aatā gayā

us ke ruj.hān-e-nazar meñ dilkashī paate hue

e'tibār-e-gardish-e-lail-o-nahār aatā gayā

rañg lā.egī hamārī tañg-dastī ek din

misl-e-ġhālib 'shād' gar sab kuchh udhār aatā gayā

ahd-e-mayusi jahan tak sazgar aata gaya

apne-ape mein dil-e-be-iKHtiyar aata gaya

kuchh sukun kuchh zabt kuchh rang-e-qarar aata gaya

al-gharaz iKHfa-e-raaz-e-qurb-e-yar aata gaya

uDte uDte us ke aane ki KHabar milti rahi

baal khole muzhda-e-gesu-e-yar aata gaya

rafta rafta meri al-gharzi asar karti rahi

meri be-parwaiyon par us ko pyar aata gaya

jasta jasta lahlahaya gulshan-e-zaKHm-e-jigar

rafta rafta dasta-e-gul par nikhaar aata gaya

nind aankhon mein magar aati gai uDti gai

dosh-e-nikhat par payam-e-zulf-e-yar aata gaya

us ne jis had tak bhi hum se dastan-e-gham suni

hum ko is nisbat se fan-e-iKHtisar aata gaya

ghaaliban ye bhi hai meri kaamyabi ka sabab

apni nakaami pe ghussa bar bar aata gaya

un mein shamil muskuraate phul bhi tare bhi hain

jin darichon se shuur-e-husn-e-yar aata gaya

aage aage aashiyane KHar-o-KHas chunte chale

pichhe pichhe taKHt-e-taus-e-bahaar aata gaya

is qadar nazdik-tar aati rahi qadmon ki chap

jis qadar KHadsha KHilaf-e-intizar aata gaya

us ke rujhan-e-nazar mein dilkashi pate hue

e'tibar-e-gardish-e-lail-o-nahaar aata gaya

rang laegi hamari tang-dasti ek din

misl-e-ghaalib 'shad' gar sab kuchh udhaar aata gaya