aish se kyun KHush hue kyun gham se ghabraya kiye

aish se kyuuñ ḳhush hue kyuuñ ġham se ghabrāyā kiye

zindagī kyā jaane kyā thī aur kyā samjhā kiye

nāla-e-be-tāb lab tak aate aate rah gayā

jaane kyā sharmīlī nazroñ se vo farmāyā kiye

ishq kī ma.asūmiyoñ kā ye bhī ik andāz thā

ham nigāh-e-lutf-e-jānāñ se bhī sharmāyā kiye

nāḳhudā be-ḳhud fazā ḳhāmosh sākit mauj-e-āb

aur ham sāhil se thoḌī duur par Duubā kiye

vo havā.eñ vo ghaTā.eñ vo fazā vo us kī yaad

ham bhī mizrāb-e-alam se sāz-e-dil chheḌā kiye

muḳhtasar ye hai hamārī dāstān-e-zindagī

ik sukūn-e-dil kī ḳhātir umr bhar taḌpā kiye

kaaT dī yuuñ ham ne 'jazbī' rāh-e-manzil kaaT dī

gir paḌe har gaam par har gaam par sambhlā kiye

aish se kyun KHush hue kyun gham se ghabraya kiye

zindagi kya jaane kya thi aur kya samjha kiye

nala-e-be-tab lab tak aate aate rah gaya

jaane kya sharmili nazron se wo farmaya kiye

ishq ki masumiyon ka ye bhi ek andaz tha

hum nigah-e-lutf-e-jaanan se bhi sharmaya kiye

naKHuda be-KHud faza KHamosh sakit mauj-e-ab

aur hum sahil se thoDi dur par Duba kiye

wo hawaen wo ghaTaen wo faza wo us ki yaad

hum bhi mizrab-e-alam se saz-e-dil chheDa kiye

muKHtasar ye hai hamari dastan-e-zindagi

ek sukun-e-dil ki KHatir umr bhar taDpa kiye

kaT di yun hum ne 'jazbi' rah-e-manzil kaT di

gir paDe har gam par har gam par sambhla kiye