asiron mein bhi ho jaen jo kuchh aashufta-sar paida

asīroñ meñ bhī ho jaa.eñ jo kuchh āshufta-sar paidā

abhī dīvār-e-zindāñ meñ huā jaatā hai dar paidā

kiye haiñ chāk-e-dil se bū-e-gul ne bāl-o-par paidā

havas hai zindagānī kī to zauq-e-marg kar paidā

ye musht-e-ḳhāk agar kar le par-o-bāl-e-nazar paidā

to auj-e-lā-makāñ tak hoñ hazāroñ rahguzar paidā

jamāl-e-dost pinhāñ parda-e-shams-o-qamar paidā

yahī parde to karte haiñ taqāzā-e-nazar paidā

mohabbat tere sadqe tū ne kar dī vo nazar paidā

jidhar āñkheñ uThīñ hotā hai husn-e-jalvagar paidā

shab-e-ġham ab manā.e ḳhair apne jeb o dāman kī

rahe dast-e-junūñ baaqī to kar leñge sahar paidā

mazāq-e-sar-bulandī ho to phir dair o haram kaise

jabīñ-sā.ī kī fitrat ne kiye haiñ sañg-e-dar paidā

nisār is lan-tarānī ke ye kyā kam hai sharaf us kā

dil-e-ḳhuddār ne kar lī nigāh-e-ḳhud-nigar paidā

javāno ye sadā.eñ aa rahī haiñ ābshāroñ se

chaTāneñ chuur ho jaa.eñ jo ho azm-e-safar paidā

vo shabnam kā sukūñ ho yā ki parvāne kī betābī

agar uḌne kī dhun hogī to hoñge bāl-o-par paidā

'suhail' ab pūchhnā hai inqilāb-e-āsmānī se

hamārī shām-e-ġham kī bhī kabhī hogī sahar paidā

asiron mein bhi ho jaen jo kuchh aashufta-sar paida

abhi diwar-e-zindan mein hua jata hai dar paida

kiye hain chaak-e-dil se bu-e-gul ne baal-o-par paida

hawas hai zindagani ki to zauq-e-marg kar paida

ye musht-e-KHak agar kar le par-o-baal-e-nazar paida

to auj-e-la-makan tak hon hazaron rahguzar paida

jamal-e-dost pinhan parda-e-shams-o-qamar paida

yahi parde to karte hain taqaza-e-nazar paida

mohabbat tere sadqe tu ne kar di wo nazar paida

jidhar aankhen uThin hota hai husn-e-jalwagar paida

shab-e-gham ab manae KHair apne jeb o daman ki

rahe dast-e-junun baqi to kar lenge sahar paida

mazaq-e-sar-bulandi ho to phir dair o haram kaise

jabin-sai ki fitrat ne kiye hain sang-e-dar paida

nisar is lan-tarani ke ye kya kam hai sharaf us ka

dil-e-KHuddar ne kar li nigah-e-KHud-nigar paida

jawano ye sadaen aa rahi hain aabshaaron se

chaTanen chur ho jaen jo ho azm-e-safar paida

wo shabnam ka sukun ho ya ki parwane ki betabi

agar uDne ki dhun hogi to honge baal-o-par paida

'suhail' ab puchhna hai inqilab-e-asmani se

hamari sham-e-gham ki bhi kabhi hogi sahar paida