aur kya mere liye arsa-e-mahshar hoga

aur kyā mere liye arsa-e-mahshar hogā

maiñ shajar hūñgā tire haath meñ patthar hogā

yuuñ bhī guzreñgī tire hijr meñ rāteñ merī

chāñd bhī jaise mire siine meñ ḳhanjar hogā

zindagī kyā hai ka.ī baar ye sochā maiñ ne

ḳhvāb se pahle kisī ḳhvāb kā manzar hogā

haath phailā.e hue shaam jahāñ aa.egī

band hotā huā darvāza-e-ḳhāvar hogā

maiñ kisī paas ke sahrā meñ bikhar jā.ūñgā

tū kisī daur ke sāhil kā samundar hogā

vo mirā shahr nahīñ shahr-e-ḳhamoshāñ kī tarah

jis meñ har shaḳhs kā marnā hī muqaddar hogā

kaun Dūbegā kise paar utarnā hai 'zafar'

faisla vaqt ke dariyā meñ utar kar hogā

aur kya mere liye arsa-e-mahshar hoga

main shajar hunga tere hath mein patthar hoga

yun bhi guzrengi tere hijr mein raaten meri

chand bhi jaise mere sine mein KHanjar hoga

zindagi kya hai kai bar ye socha main ne

KHwab se pahle kisi KHwab ka manzar hoga

hath phailae hue sham jahan aaegi

band hota hua darwaza-e-KHawar hoga

main kisi pas ke sahra mein bikhar jaunga

tu kisi daur ke sahil ka samundar hoga

wo mera shahr nahin shahr-e-KHamoshan ki tarah

jis mein har shaKHs ka marna hi muqaddar hoga

kaun Dubega kise par utarna hai 'zafar'

faisla waqt ke dariya mein utar kar hoga