bazm Khaali nahin mehman nikal aate hain

bazm ḳhālī nahīñ mehmān nikal aate haiñ

kuchh to afsāne mirī jaan nikal aate haiñ

roz ik marg kā aalam bhī guzartā hai yahāñ

roz jiine ke bhī sāmān nikal aate haiñ

sochtā huuñ par-e-parvāz sameTūñ lekin

kitne bhūle hue paimān nikal aate haiñ

yaad ke so.e hue qāfile jaag uThte haiñ

ḳhvāb ke kuchh na.e unvān nikal aate haiñ

baiThnā chāhtī hai thak ke jo vahshat apnī

kitne hī dasht-o-bayābān nikal aate haiñ

isti.āre haiñ jo āñkhoñ se chhalak paḌte haiñ

kitne hī ashk ke dīvān nikal aate haiñ

ik zarā chain bhī lete nahīñ 'tābish'-sāhab

mulk-e-ġham se na.e farmān nikal aate haiñ

bazm KHali nahin mehman nikal aate hain

kuchh to afsane meri jaan nikal aate hain

roz ek marg ka aalam bhi guzarta hai yahan

roz jine ke bhi saman nikal aate hain

sochta hun par-e-parwaz sameTun lekin

kitne bhule hue paiman nikal aate hain

yaad ke soe hue qafile jag uThte hain

KHwab ke kuchh nae unwan nikal aate hain

baiThna chahti hai thak ke jo wahshat apni

kitne hi dasht-o-bayaban nikal aate hain

istiare hain jo aankhon se chhalak paDte hain

kitne hi ashk ke diwan nikal aate hain

ek zara chain bhi lete nahin 'tabish'-sahab

mulk-e-gham se nae farman nikal aate hain