chand mohmal si lakiren hi sahi ifsha rahun

chand mohmal sī lakīreñ hī sahī ifshā rahūñ

nok-e-ḳhāma par ba-rañg-e-raushnā.ī kyā rahūñ

koī shāyad aa hī jaa.e rāsta taktā rahūñ

ek sañg-e-mīl ban jā.ūñ ba-chashm-e-vā rahūñ

khaa.ī se sab ko bachā luuñ maiñ na kuchlā jā.ūñ to

ban ke ḳhatre kā nishāñ raste meñ istāda rahūñ

dasht-e-tanhā.ī meñ yādoñ ke darindoñ se Darūñ

bach-bachā ke bhiiḌ meñ aa.uuñ to phir tanhā rahūñ

zarre zarre meñ bikhar jaanā hai takmīl-e-hayāt

mujh ko ye zebā nahīñ ab zaat meñ simTā rahūñ

apnī āvāzeñ hī jab bār-e-samā.at haiñ 'zahīr'

chīḳhte gumbad meñ behtar hai ki maiñ gūñgā rahūñ

chand mohmal si lakiren hi sahi ifsha rahun

nok-e-KHama par ba-rang-e-raushnai kya rahun

koi shayad aa hi jae rasta takta rahun

ek sang-e-mil ban jaun ba-chashm-e-wa rahun

khai se sab ko bacha lun main na kuchla jaun to

ban ke KHatre ka nishan raste mein istada rahun

dasht-e-tanhai mein yaadon ke darindon se Darun

bach-bacha ke bhiD mein aaun to phir tanha rahun

zarre zarre mein bikhar jaana hai takmil-e-hayat

mujh ko ye zeba nahin ab zat mein simTa rahun

apni aawazen hi jab bar-e-samaat hain 'zahir'

chiKHte gumbad mein behtar hai ki main gunga rahun