charcha hamara ishq ne kyun ja-ba-ja kiya

charchā hamārā ishq ne kyuuñ jā-ba-jā kiyā

dil us ko de diyā to bhalā kyā burā kyā

ab kholiye kitāb-e-nasīhat ko shaiḳh phir

shab mai-kade meñ aap ne jo kuchh kiyā kiyā

vo ḳhvāb-e-nāz meñ the mirā dīda-e-niyāz

dekhā kiyā aur un kī balā.eñ liyā kiyā

roz-e-azal se tā-ba-abad apnī jaib kā

thā ek chaak jis ko maiñ baiThā siyā kiyā

dekhe jo daaġh dāman-e-isyāñ pe be-shumār

maiñ ne bhī josh-e-girya se tūfāñ bapā kiyā

gum-karda raah aa.e haiñ vo aaj mere ghar

ai merī āh-e-nīm-shabī tū ne kyā kiyā

kyā pūchhte ho dast-e-qanā.at kī kotahī

kuchh vā shab-e-visāl meñ band qabā kiyā

lazzat hī thī kuchh aisī ki chhoḌā na sabr ko

karte rahe vo jaur-o-sitam maiñ sahā kiyā

kyā shai thī vo jo aañkh se dil meñ utar ga.ī

dil se uThī to ashk kā tūfāñ bapā kiyā

phir le chalā hai kal mujhe kyuuñ bazm-e-yār meñ

ījād us ne kyā koī tarz-e-jafā kiyā

'shaidā' ġhazal paḌho koī majlis meñ dūsrī

ik paḌh ke rah ga.e to bhalā tum ne kyā kiyā

charcha hamara ishq ne kyun ja-ba-ja kiya

dil us ko de diya to bhala kya bura kya

ab kholiye kitab-e-nasihat ko shaiKH phir

shab mai-kade mein aap ne jo kuchh kiya kiya

wo KHwab-e-naz mein the mera dida-e-niyaz

dekha kiya aur un ki balaen liya kiya

roz-e-azal se ta-ba-abad apni jaib ka

tha ek chaak jis ko main baiTha siya kiya

dekhe jo dagh daman-e-isyan pe be-shumar

main ne bhi josh-e-girya se tufan bapa kiya

gum-karda rah aae hain wo aaj mere ghar

ai meri aah-e-nim-shabi tu ne kya kiya

kya puchhte ho dast-e-qanaat ki kotahi

kuchh wa shab-e-visal mein band qaba kiya

lazzat hi thi kuchh aisi ki chhoDa na sabr ko

karte rahe wo jaur-o-sitam main saha kiya

kya shai thi wo jo aankh se dil mein utar gai

dil se uThi to ashk ka tufan bapa kiya

phir le chala hai kal mujhe kyun bazm-e-yar mein

ijad us ne kya koi tarz-e-jafa kiya

'shaida' ghazal paDho koi majlis mein dusri

ek paDh ke rah gae to bhala tum ne kya kiya