dard baDh kar dawa na ho jae

dard baḌh kar davā na ho jaa.e

zindagī be-mazā na ho jaa.e

in talavvun-mizājiyoñ kā shikār

koī mere sivā na ho jaa.e

lazzat-e-intizār hī na rahe

kahīñ vaada vafā na ho jaa.e

terī raftār ai ma.āz-allāh

hashr koī bapā na ho jaa.e

kāmyābī hī kāmyābī ho

to ye banda ḳhudā na ho jaa.e

merī betābiyoñ se ghabrā kar

koī mujh se ḳhafā na ho jaa.e

kuchh to andāza-e-jafā kījiye

dil sitam-āshnā na ho jaa.e

kahīñ nākāmi-e-asar āḳhir

mudda.ā-e-duā na ho jaa.e

vo nigāheñ na pher leñ 'aḳhtar'

ishq be-āsrā na ho jaa.e

dard baDh kar dawa na ho jae

zindagi be-maza na ho jae

in talawwun-mizajiyon ka shikar

koi mere siwa na ho jae

lazzat-e-intizar hi na rahe

kahin wada wafa na ho jae

teri raftar ai maaz-allah

hashr koi bapa na ho jae

kaamyabi hi kaamyabi ho

to ye banda KHuda na ho jae

meri betabiyon se ghabra kar

koi mujh se KHafa na ho jae

kuchh to andaza-e-jafa kijiye

dil sitam-ashna na ho jae

kahin nakaami-e-asar aaKHir

muddaa-e-dua na ho jae

wo nigahen na pher len 'aKHtar'

ishq be-asra na ho jae