dimagh-o-dida-o-dil bar-sar-e-paikar hote hain

dimāġh-o-dīda-o-dil bar-sar-e-paikār hote haiñ

mohabbat kī kahānī meñ ka.ī kirdār hote haiñ

ye duniyā bāġh-e-zebā hai magar chashm-e-tamāshā meñ

sar-e-shāḳh-e-tamannā phuul bhī do-chār hote haiñ

kisī se ishq ho jaane ko afsāna nahīñ kahte

ki afsāne mata-e-kūcha-o-bāzār hote haiñ

ḳhayāloñ meñ kahīñ naġhma kahīñ ġhuncha kahīñ sahbā

dam-e-nazzāra ye nāzuk badan talvār hote haiñ

kisī pur-pech rasm-e-dostī kā mā-hasal ye hai

ghanere jañgaloñ ke rāste hamvār hote haiñ

safā.ī se kaho jo kuchh kaho kyuuñ zaḳhm dhote ho

masīhā kah ke ham qātil ke jānib-dār hote haiñ

dimagh-o-dida-o-dil bar-sar-e-paikar hote hain

mohabbat ki kahani mein kai kirdar hote hain

ye duniya bagh-e-zeba hai magar chashm-e-tamasha mein

sar-e-shaKH-e-tamanna phul bhi do-chaar hote hain

kisi se ishq ho jaane ko afsana nahin kahte

ki afsane mata-e-kucha-o-bazar hote hain

KHayalon mein kahin naghma kahin ghuncha kahin sahba

dam-e-nazzara ye nazuk badan talwar hote hain

kisi pur-pech rasm-e-dosti ka ma-hasal ye hai

ghanere jangalon ke raste hamwar hote hain

safai se kaho jo kuchh kaho kyun zaKHm dhote ho

masiha kah ke hum qatil ke jaanib-dar hote hain