Dubne wala tha din sham thi hone wali

Dūbne vaalā thā din shaam thī hone vaalī

yuuñ lagā merī koī chiiz thī khone vaalī

sub.h ke saath huī ḳhatm merī raat kī gasht

rah ga.ī ek galī shahr ke kone vaalī

kitnā shaffāf chamaktā huā din thā jis kī

dhuup thī pyaar kī bārish meñ bhigone vaalī

kisī nā-dīda ghaḌī ke liye tayyār thā maiñ

aisī chup thī ki koī baat thī hone vaalī

zindagī mailī huī gard-e-mah-o-sāl ke saath

ik jagah chhoḌ ke hai puurī ye dhone vaalī

laakh banjar ho zamīñ phir bhī panap jā.egī

āḳhirī shai jo mire paas hai bone vaalī

itnī masrūf hai hañgāma-e-be-masraf meñ

sub.h se pahle nahīñ raat ye sone vaalī

zindagī aur hī hotī hai basar karne ko

terī merī hai faqat bojh ko Dhone vaalī

kis jagah hogā mujhe joḌne vaalā lamha

vo ghaḌī zaat ke dānoñ ko pirone vaalī

saarā sabza thā kisī maḳhmalī bistar kī tarah

aur zamīñ ghaas ke taḳhte pe thī sone vaalī

yuuñ to har baat yahāñ hotī rahegī lekin

tirī ḳhvāhish ke mutābiq nahīñ hone vaalī

baat is baar gharoñ tak nahīñ rahnī 'shāhīñ'

ab ke tuġhyānī hai shahroñ ko Dubone vaalī

Dubne wala tha din sham thi hone wali

yun laga meri koi chiz thi khone wali

subh ke sath hui KHatm meri raat ki gasht

rah gai ek gali shahr ke kone wali

kitna shaffaf chamakta hua din tha jis ki

dhup thi pyar ki barish mein bhigone wali

kisi na-dida ghaDi ke liye tayyar tha main

aisi chup thi ki koi baat thi hone wali

zindagi maili hui gard-e-mah-o-sal ke sath

ek jagah chhoD ke hai puri ye dhone wali

lakh banjar ho zamin phir bhi panap jaegi

aaKHiri shai jo mere pas hai bone wali

itni masruf hai hangama-e-be-masraf mein

subh se pahle nahin raat ye sone wali

zindagi aur hi hoti hai basar karne ko

teri meri hai faqat bojh ko Dhone wali

kis jagah hoga mujhe joDne wala lamha

wo ghaDi zat ke danon ko pirone wali

sara sabza tha kisi maKHmali bistar ki tarah

aur zamin ghas ke taKHte pe thi sone wali

yun to har baat yahan hoti rahegi lekin

teri KHwahish ke mutabiq nahin hone wali

baat is bar gharon tak nahin rahni 'shahin'

ab ke tughyani hai shahron ko Dubone wali