ehsas-e-na-rasai se jis dam udas tha

ehsās-e-nā-rasā.ī se jis dam udaas thā

shāyad vo us ghaḌī bhī mire aas paas thā

mahfil meñ phuul ḳhushiyoñ ke jo bāñTtā rahā

tanhā.ī meñ milā to bahut hī udaas thā

har zaḳhm-e-kohnā vaqt ke marham ne bhar diyā

vo dard bhī miTā jo ḳhushī kī asaas thā

añgḌā.ī lī sahar ne to lamhe chahak uThe

jañgal meñ varna raat ke ḳhauf o hirās thā

sūraj pe vaqt kā jo gahan lag gayā 'hanīf'

dekhā to mujh se saaya mirā nā-shanās thā

ehsas-e-na-rasai se jis dam udas tha

shayad wo us ghaDi bhi mere aas pas tha

mahfil mein phul KHushiyon ke jo banTta raha

tanhai mein mila to bahut hi udas tha

har zaKHm-e-kohna waqt ke marham ne bhar diya

wo dard bhi miTa jo KHushi ki asas tha

angDai li sahar ne to lamhe chahak uThe

jangal mein warna raat ke KHauf o hiras tha

suraj pe waqt ka jo gahan lag gaya 'hanif'

dekha to mujh se saya mera na-shanas tha