falah-e-admiyat mein saubat sah ke mar jaana

falāh-e-ādmiyat meñ sa.ūbat sah ke mar jaanā

yahī hai kaam kar jaanā yahī hai naam kar jaanā

jahāñ insāniyat vahshat ke hāthoñ zab.h hotī ho

jahāñ tazlīl hai jiinā vahāñ behtar hai mar jaanā

yūñhī dair o haram kī Thokareñ khāte phire barsoñ

tirī Thokar se likkhā thā muqaddar kā sañvar jaanā

sukūn-e-rūh miltā hai zamāne ko tire dar se

bahisht-o-ḳhuld ke mānind ham ne terā dar jaanā

hamārī sāda-lauhī thī ḳhudā-baḳhshe ki ḳhush-fahmī

ki har insān kī sūrat ko mā-fauq-ul-bashar jaanā

ye hai rindoñ pe rahmat roz-e-mahshar ḳhud mashiyyat ne

likhā hai āb-e-kausar se nikhar jaanā sañvar jaanā

chaman meñ is qadar sahme hue haiñ āshiyāñ vaale

ki jugnū kī chamak ko sāzish-e-barq-o-sharar jaanā

hameñ ḳhār-e-vatan 'gulzār' pyāre haiñ gul-e-tar se

ki har zarre ko ḳhāk-e-hind ke shams o qamar jaanā

falah-e-admiyat mein saubat sah ke mar jaana

yahi hai kaam kar jaana yahi hai nam kar jaana

jahan insaniyat wahshat ke hathon zabh hoti ho

jahan tazlil hai jina wahan behtar hai mar jaana

yunhi dair o haram ki Thokaren khate phire barson

teri Thokar se likkha tha muqaddar ka sanwar jaana

sukun-e-ruh milta hai zamane ko tere dar se

bahisht-o-KHuld ke manind hum ne tera dar jaana

hamari sada-lauhi thi KHuda-baKHshe ki KHush-fahmi

ki har insan ki surat ko ma-fauq-ul-bashar jaana

ye hai rindon pe rahmat roz-e-mahshar KHud mashiyyat ne

likha hai aab-e-kausar se nikhar jaana sanwar jaana

chaman mein is qadar sahme hue hain aashiyan wale

ki jugnu ki chamak ko sazish-e-barq-o-sharar jaana

hamein KHar-e-watan 'gulzar' pyare hain gul-e-tar se

ki har zarre ko KHak-e-hind ke shams o qamar jaana