fareb-e-yar ne chaunka diya tha

fareb-e-yār ne chauñkā diyā thā

hameñ to pyaar ne chauñkā diyā thā

hazāroñ saal thī us kī riyāzat

bas ik inkār ne chauñkā diyā thā

fasīleñ ban ga.ī thiiñ chaar jānib

ajab asrār ne chauñkā diyā thā

mohabbat kī hameñ fursat nahīñ thī

jamāl-e-yār ne chauñkā diyā thā

ham apne-āp meñ gum jā rahe the

kisī guftār ne chauñkā diyā thā

jo ik aañsū bahā thā vaqt-e-ruḳhsat

usī iz.hār ne chauñkā diyā thā

bichhaḌte vaqt us ne jo kahā thā

usī iqrār ne chauñkā diyā thā

vo dast-e-ġhaib ban kar aa ga.e the

hameñ aġhyār ne chauñkā diyā thā

fareb-e-yar ne chaunka diya tha

hamein to pyar ne chaunka diya tha

hazaron sal thi us ki riyazat

bas ek inkar ne chaunka diya tha

fasilen ban gai thin chaar jaanib

ajab asrar ne chaunka diya tha

mohabbat ki hamein fursat nahin thi

jamal-e-yar ne chaunka diya tha

hum apne-ap mein gum ja rahe the

kisi guftar ne chaunka diya tha

jo ek aansu baha tha waqt-e-ruKHsat

usi izhaar ne chaunka diya tha

bichhaDte waqt us ne jo kaha tha

usi iqrar ne chaunka diya tha

wo dast-e-ghaib ban kar aa gae the

hamein aghyar ne chaunka diya tha