ghairon ko bhala samjhe aur mujhko bura jaana

ġhairoñ ko bhalā samjhe aur mujh ko burā jaanā

samjhe bhī to kyā samjhe jaanā bhī to kyā jaanā

ik umr ke dukh paa.e sote haiñ farāġhat se

ai ġhalġhala-e-mahshar ham ko na jagā jaanā

māñgūñ to sahī bosa par kyā hai ilaaj is kā

yaañ hoñT kā hil jaanā vaañ baat kā pā jaanā

go umr basar us kī tahqīq meñ kī to bhī

māhiyyat-e-aslī ko apnī na zarā jaanā

kyā yaar kī bad-ḳhūī kyā ġhair kī bad-ḳhvāhī

sarmāya-e-sad-āfat hai dil hī kā aa jaanā

kuchh arz-e-tamannā meñ shikva na sitam kā thā

maiñ ne to kahā kyā thā aur aap ne kyā jaanā

ik shab na use laa.e kuchh rañg na dikhlā.e

ik shor-e-qayāmat hī nāloñ ne uThā jaanā

chilman kā ulaT jaanā zāhir kā bahāna hai

un ko to bahar-sūrat ik jalva dikhā jaanā

hai haq ba-taraf us ke chāhe sau sitam kar le

us ne dil-e-āshiq ko majbūr-e-vafā jaanā

anjām huā apnā āġhāz-e-mohabbat meñ

is shaġhl ko jāñ-farsā aisā to na thā jaanā

'majrūh' hue maa.il kis āfat-e-daurāñ par

ai hazrat-e-man tum ne dil bhī na lagā jaanā

ghairon ko bhala samjhe aur mujh ko bura jaana

samjhe bhi to kya samjhe jaana bhi to kya jaana

ek umr ke dukh pae sote hain faraghat se

ai ghalghala-e-mahshar hum ko na jaga jaana

mangun to sahi bosa par kya hai ilaj is ka

yan honT ka hil jaana wan baat ka pa jaana

go umr basar us ki tahqiq mein ki to bhi

mahiyyat-e-asli ko apni na zara jaana

kya yar ki bad-KHui kya ghair ki bad-KHwahi

sarmaya-e-sad-afat hai dil hi ka aa jaana

kuchh arz-e-tamanna mein shikwa na sitam ka tha

main ne to kaha kya tha aur aap ne kya jaana

ek shab na use lae kuchh rang na dikhlae

ek shor-e-qayamat hi nalon ne uTha jaana

chilman ka ulaT jaana zahir ka bahana hai

un ko to bahar-surat ek jalwa dikha jaana

hai haq ba-taraf us ke chahe sau sitam kar le

us ne dil-e-ashiq ko majbur-e-wafa jaana

anjam hua apna aaghaz-e-mohabbat mein

is shaghl ko jaan-farsa aisa to na tha jaana

'majruh' hue mail kis aafat-e-dauran par

ai hazrat-e-man tum ne dil bhi na laga jaana