gham se mansub karun dard ka rishta de dun

ġham se mansūb karūñ dard kā rishta de duuñ

zindagī aa tujhe jiine kā salīqa de duuñ

be-charāgī ye tirī shām-e-ġharībāñ kab tak

chal tujhe jalte makānoñ kā ujālā de duuñ

zindagī ab to yahī shakl hai samjhaute kī

duur haT jā.ūñ tirī raah se rastā de duuñ

tishnagī tujh ko bujhānā mujhe manzūr nahīñ

varna qatre kī hai kyā baat maiñ dariyā de duuñ

lī hai añgḌā.ī to phir haath uThā kar rakhiye

Thahariye maiñ use lafzoñ kā labāda de duuñ

ai mire fan tujhe takmīl ko pahuñchānā hai

aa tujhe ḳhuun kā maiñ āḳhirī qatra de duuñ

sūraj aa jaa.e kisī din jo mere haath 'alī'

ghoñT duuñ raat kā dam sab ko ujālā de duuñ

gham se mansub karun dard ka rishta de dun

zindagi aa tujhe jine ka saliqa de dun

be-charagi ye teri sham-e-ghariban kab tak

chal tujhe jalte makanon ka ujala de dun

zindagi ab to yahi shakl hai samjhaute ki

dur haT jaun teri rah se rasta de dun

tishnagi tujh ko bujhana mujhe manzur nahin

warna qatre ki hai kya baat main dariya de dun

li hai angDai to phir hath uTha kar rakhiye

Thahariye main use lafzon ka labaada de dun

ai mere fan tujhe takmil ko pahunchana hai

aa tujhe KHun ka main aaKHiri qatra de dun

suraj aa jae kisi din jo mere hath 'ali'

ghonT dun raat ka dam sab ko ujala de dun