gila ai dil abhi se karta hai
![Maulana Mohammad Ali Jauhar Maulana Mohammad Ali Jauhar](https://rekhta.pc.cdn.bitgravity.com/Images/Shayar/round/maulana-mohammad-ali-jauhar.png)
gila ai dil abhi se karta hai
Maulana Mohammad Ali Jauhar
MORE BYMaulana Mohammad Ali Jauhar
gila ai dil abhī se kartā hai
ishq kā dam usī pe bhartā hai
jaan detā hai aish-e-fānī par
bas isī zindagī pe martā hai
rāhat-e-jāvedāñ ko bhuul gayā
koī duniyā meñ ye bhī kartā hai
ishq ban kar jiye to ḳhaak jiye
zinda vo hai jo un pe martā hai
naam par us ke sab jo de baiThā
vahī ik hai jo naam kartā hai
vaqf momin hai āzmāish-e-ishq
is meñ puurā vahī utartā hai
jis ko duniyā ne nā-murād kiyā
vahī nākām kaam kartā hai
hai musalmāñ kī bas yahī pahchān
ki faqat ik ḳhudā se Dartā hai
qaul-e-momin hai us ke fel kī sharh
vo jo kahtā hai kar guzartā hai
mutma.in rah dilā vo jān-e-jahāñ
vaada kar ke kahīñ mukartā hai
mere rañg-e-kafan kī shoḳhī dekh
yuuñ hī āshiq tirā sañvartā hai
aaj kar lo jo kar sako kal tak
kaun jiitā hai kaun martā hai
qulzum-e-ishq meñ girā so girā
us kā Duubā kahīñ ubhartā hai
is qadar ehtiyāt ai sayyād
ki qafas meñ bhī par katartā hai
vahī din hai hamārī iid kā din
jo tirī yaad meñ guzartā hai
mai-e-islām kā bhalā 'jauhar'
nashsha chaḌh kar kahīñ utartā hai
gila ai dil abhi se karta hai
ishq ka dam usi pe bharta hai
jaan deta hai aish-e-fani par
bas isi zindagi pe marta hai
rahat-e-jawedan ko bhul gaya
koi duniya mein ye bhi karta hai
ishq ban kar jiye to KHak jiye
zinda wo hai jo un pe marta hai
nam par us ke sab jo de baiTha
wahi ek hai jo nam karta hai
waqf momin hai aazmaish-e-ishq
is mein pura wahi utarta hai
jis ko duniya ne na-murad kiya
wahi nakaam kaam karta hai
hai musalman ki bas yahi pahchan
ki faqat ek KHuda se Darta hai
qaul-e-momin hai us ke fel ki sharh
wo jo kahta hai kar guzarta hai
mutmain rah dila wo jaan-e-jahan
wada kar ke kahin mukarta hai
mere rang-e-kafan ki shoKHi dekh
yun hi aashiq tera sanwarta hai
aaj kar lo jo kar sako kal tak
kaun jita hai kaun marta hai
qulzum-e-ishq mein gira so gira
us ka Duba kahin ubharta hai
is qadar ehtiyat ai sayyaad
ki qafas mein bhi par katarta hai
wahi din hai hamari id ka din
jo teri yaad mein guzarta hai
mai-e-islam ka bhala 'jauhar'
nashsha chaDh kar kahin utarta hai
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.