guftugu achchhi lagi zauq-e-nazar achchha laga

guftugū achchhī lagī zauq-e-nazar achchhā lagā

muddatoñ ke baad koī ham-safar achchhā lagā

dil kā dukh jaanā to dil kā mas.ala hai par hameñ

us kā hañs denā hamāre haal par achchhā lagā

har tarah kī be-sar-o-sāmāniyoñ ke bāvajūd

aaj vo aayā to mujh ko apnā ghar achchhā lagā

bāġhbāñ gulchīñ ko chāhe jo kahe ham ko to phuul

shāḳh se baḌh kar kaf-e-dildār par achchhā lagā

koī maqtal meñ na pahuñchā kaun zālim thā jise

teġh-e-qātil se ziyāda apnā sar achchhā lagā

ham bhī qaa.il haiñ vafā meñ ustuvārī ke magar

koī pūchhe kaun kis ko umr bhar achchhā lagā

apnī apnī chāhateñ haiñ log ab jo bhī kaheñ

ik parī-paikar ko ik āshufta-sar achchhā lagā

'mīr' ke mānind aksar ziist kartā thā 'farāz'

thā to vo dīvāna sā shā.ir magar achchhā lagā

guftugu achchhi lagi zauq-e-nazar achchha laga

muddaton ke baad koi ham-safar achchha laga

dil ka dukh jaana to dil ka masala hai par hamein

us ka hans dena hamare haal par achchha laga

har tarah ki be-sar-o-samaniyon ke bawajud

aaj wo aaya to mujh ko apna ghar achchha laga

baghban gulchin ko chahe jo kahe hum ko to phul

shaKH se baDh kar kaf-e-dildar par achchha laga

koi maqtal mein na pahuncha kaun zalim tha jise

tegh-e-qatil se ziyaada apna sar achchha laga

hum bhi qail hain wafa mein ustuwari ke magar

koi puchhe kaun kis ko umr bhar achchha laga

apni apni chahaten hain log ab jo bhi kahen

ek pari-paikar ko ek aashufta-sar achchha laga

'mir' ke manind aksar zist karta tha 'faraaz'

tha to wo diwana sa shair magar achchha laga