hai ajab haal ye zamane ka

hai ajab haal ye zamāne kā

yaad bhī taur hai bhulāne kā

pasand aayā bahut hameñ pesha

ḳhud hī apne gharoñ ko Dhāne kā

kaash ham ko bhī ho nasīb kabhī

aish-e-daftar meñ gungunāne kā

āsmāñ hai ḳhamoshī-e-jāved

maiñ bhī ab lab nahīñ hilāne kā

jaan kyā ab tirā piyāla-e-nāf

nashsha mujh ko nahīñ pilāne kā

shauq hai is dil-e-darinda ko

aap ke hoñT kaaT khāne kā

itnā nādim huā huuñ ḳhud se ki maiñ

ab nahīñ ḳhud ko āzmāne kā

kyā kahūñ jaan ko bachāne maiñ

'jaun' ḳhatra hai jaan jaane kā

ye jahāñ 'jaun' ik jahannum hai

yaañ ḳhudā bhī nahīñ hai aane kā

zindagī ek fan hai lamhoñ ko

apne andāz se gañvāne kā

hai ajab haal ye zamane ka

yaad bhi taur hai bhulane ka

pasand aaya bahut hamein pesha

KHud hi apne gharon ko Dhane ka

kash hum ko bhi ho nasib kabhi

aish-e-daftar mein gungunane ka

aasman hai KHamoshi-e-jawed

main bhi ab lab nahin hilane ka

jaan kya ab tera piyala-e-naf

nashsha mujh ko nahin pilane ka

shauq hai is dil-e-darinda ko

aap ke honT kaT khane ka

itna nadim hua hun KHud se ki main

ab nahin KHud ko aazmane ka

kya kahun jaan ko bachane main

'jaun' KHatra hai jaan jaane ka

ye jahan 'jaun' ek jahannum hai

yan KHuda bhi nahin hai aane ka

zindagi ek fan hai lamhon ko

apne andaz se ganwane ka