hai chaman mein rahm gulchin ko na kuchh sayyaad ko

hai chaman meñ rahm gulchīñ ko na kuchh sayyād ko

ab ḳhudā hī shaad rakkhe bulbul-e-nāshād ko

sūjhtī thī koh-o-sahrā meñ yahī har dam mujhe

kījiye ġham qais kā aur roiye farhād ko

hichkiyāñ aatī haiñ par lete nahīñ vo merā naam

dekhnā un kī farāmoshī ko merī yaad ko

yaad meñ un ke havās-e-ḳhamsa de dete haiñ ham

aah ko naale ko ġhul ko shor ko fariyād ko

jā.egī gulshan talak us gul kī aamad kī ḳhabar

aa.egī bulbul mire ghar meñ mubārakbād ko

naza.a ke dam bhī unheñ hichkī na aa.egī kabhī

yūñhī gar bhūle raheñge vo 'saḳhī' kī yaad ko

hai chaman mein rahm gulchin ko na kuchh sayyaad ko

ab KHuda hi shad rakkhe bulbul-e-nashad ko

sujhti thi koh-o-sahra mein yahi har dam mujhe

kijiye gham qais ka aur roiye farhad ko

hichkiyan aati hain par lete nahin wo mera nam

dekhna un ki faramoshi ko meri yaad ko

yaad mein un ke hawas-e-KHamsa de dete hain hum

aah ko nale ko ghul ko shor ko fariyaad ko

jaegi gulshan talak us gul ki aamad ki KHabar

aaegi bulbul mere ghar mein mubarakbaad ko

naza ke dam bhi unhen hichki na aaegi kabhi

yunhi gar bhule rahenge wo 'saKHi' ki yaad ko