hamari ham-nafasi ko bhi kya dawam hua

hamārī ham-nafasī ko bhī kyā davām huā

vo abr-e-surḳh to maiñ naḳhl-e-intiqām huā

yahīñ se mere adū kā ḳhamīr uTThā thā

zamīn dekh ke maiñ teġh-e-be-niyām huā

ḳhabar nahīñ hai mire bādshāh ko shāyad

hazār martaba āzād ye ġhulām huā

ajab safar thā ajab-tar musāfirat merī

zamīñ shurū huī aur maiñ tamām huā

vo kāhilī hai ki dil kī taraf se ġhāfil haiñ

ḳhud apne ghar kā bhī ham se na intizām huā

huī hai ḳhatm dar-o-bām kī kam-asbābī

mayassar aaj vo sāmān-e-inhidām huā

hamari ham-nafasi ko bhi kya dawam hua

wo abr-e-surKH to main naKHl-e-intiqam hua

yahin se mere adu ka KHamir uTTha tha

zamin dekh ke main tegh-e-be-niyam hua

KHabar nahin hai mere baadshah ko shayad

hazar martaba aazad ye ghulam hua

ajab safar tha ajab-tar musafirat meri

zamin shuru hui aur main tamam hua

wo kahili hai ki dil ki taraf se ghafil hain

KHud apne ghar ka bhi hum se na intizam hua

hui hai KHatm dar-o-baam ki kam-asbabi

mayassar aaj wo saman-e-inhidam hua